بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹ پارے کہ سرمچارک 10 نومبر 2024 یک شمبے نا دے ویگہ نا پنچ بجہ غا کیچ ئنا عیلاقہ دشت کھڈان ئٹی کوزہ گیر پاکستانی لشکر نا کیمپ ئے ہڑتُکا پارہ غان گھیرہ کرسا پوسکنو و بھلو سلاہ کاریم ئٹ ہتِسہ جلہو کریر۔ جلہو آن پاکستانی لشکر نا اسہ افسر تون اوار 16 لشکری کارندہ مرگ ئنا گواچی مسر و کہیی فوجیک ٹپی مسر، جلہو آن دشمن ئےمالی نسخان ہم رسینگانے۔
او پارے کہ جلہو آن مُست سرمچارک کُل عیلاقہ نا ہنوک بروک کسر تِہ بند کریسُر پدا دشمن نا کیمپ آ جلہو کریر۔ جلہو تُرند اس و باء تروک کوزہ گیر لشکر ئے ڈھکینگ نا وارخواہی رسینگتو۔ دشمن نا کمک کن بروک لشکری کارندہ غا تِہ سرمچارک ٹک کریر ہراڑان دشمن ئے جانی و مالی نسخان رسینگا۔
اونا پاننگ اس کہ جلہو ئٹی بی ایل ایف نا انٹیلیجنس ونگ و قربان یونٹ نا سنگت آک بخش ہلکر۔
ترجمان پارے کہ سرمچارک دشمن کیمپ آ پوسکنا و بھلا سلاہ تیات جلہو کریر و کیمپ ئے سرمَسُر۔ سرمچارک کیمپ ئنا دیوال و سنگر تِہ راکٹ ئٹ ٹک کرسا بِھس کریر۔ سرمچارک دشمن کیمپ ئنا تہٹی سر مرسا کیمپ ئنا سلاہ تِہ دوئی مسر۔ انداڑے قربان یونٹ نا سرمچار شہید لیفٹننٹ جمال بلوچ شہید مس۔ تینا شہید مروک سنگت ئے سرمچارک ہرفیر و تینٹ رکھوک پیشتمار۔
او پارے کہ دا جلہو ئٹی بی ایل ایف نا سرمچار لیفٹننٹ جمال بلوچ عرف ناکو ابراہیم، سری بازار تمپ گومازی نا جہی مولابخش نا مار، دشمن تون دلیری ئٹ جنگ تِرسا شہید مس۔
اونا پاننگ اس کہ شہید جمال بلوچ نا جہد، کڑدار و قربانی ننکن کسر نا چراغ ئس ءِ۔ نن اونا جہد و بھلا قربانی تِہ سلام کینہ۔
میجر گہرام بلوچ پارے کہ شہید لفٹینینٹ جمال بلوچ سیاسی وڑ ئٹ پکّو و جنگی حکمت عملی تیٹ آزموندہ تخوکو اسہ سرمچار ئس اس۔ او 2010 آ بلوچ آزادی نا تحریک ئٹ بی ایل ایف نا تنظیم ئٹ اوار مس۔ ارا سال شاری نیٹ ورک ئٹی کاریم کننگ آن پد دشمن نا نظر ئٹی بس تو 2012 آ کیمپ ئنا بخش مس۔
او ودیک پارے کہ شہید سرمچار لیفٹیننٹ جمال بلوچ عرف ناکو ابراہیم سیاھجی، مزنبند، کُلبر، زامران، بلیدہ و بالگتر ئٹی کوزہ گیر دشمن نا برخلاف کاروائی تیٹی بخش ہلِسہ دشمن ئے جانی و مالی نسخان تسنے۔ او تینا جانفشانی، جنگی گُشاد، دلیری و ایمانداری ئٹ اسہ جوْانو سنگت ئس اس۔ شہید تینا سیاسی شعور نا سوب آن تنظیم نا ادارہ و کیمپ آتا سوگوی کن جوْانو کڑد ئس ادا کریسس۔
اونا پاننگ اس کہ دشت، کھڈان جلہو ئٹی شہید جمال بلوچ سرمچار آتا اولی دستہ ” قربان یونٹ “ نا کمانے کریسس۔ او تینا سنگت آتا کمک کن کیمپ ئنا خُڑک آ بس تو دشمن نا صفہ تیٹی نزوری و خُلیس ودی کننگ ئٹ سرسوب مس۔
ترجمان پارے کہ شہید لیفٹیننٹ جمال بلوچ اسہ سال ئس مُست قربان یونٹ ئٹی بخش ہلک و تینا ذمہ واری تِہ گچینی ئٹ پورو کرے۔ دا جلہو ئٹی قربان یونٹ نا سنگت آتا کمان ئے کرسا شہادت نا بھلا جاگہ ئے ہلک و دیہاڑ ئٹ اوار مس۔
اونا پاننگ اس کہ بی ایل ایف بلوچ الس ئنا کمک و مُخ تفی ئٹ سوگو جنگی و سیاسی حکمت عملی ئٹ دشمن ئے زوت تینا سرزمین آن کشِنگ آ بیوس کرو و اندون دشت ئنا الس سرمچار آتتون کمک کرے داڑان پک مس کہ الس بلوچ سرمچار آتتون ہم کوپہ ءِ۔
ترجمان پڑو کرے کہ دا جلہو نا ویڈیو ئے زوت میڈیا غا شنگ کرون۔
اونا ایسر ئٹ پاننگ اس کہ بلوچستان لبریشن فرنٹ تینا شہید سنگت جمال بلوچ ئے دروت ندر کرسا دا عزم ئِے کیک کہ بلوچستان نا آجوئی اسکان کوزہ گیر دشمن آ جلہوک برجاء مرور و بلوچ الس ئنا کمک ئٹ راجی آجوئی نا بھلا مسخت ئے دوئی کرون۔
