بولان میڈیکل کالج ئٹ اِرا خوانندہ تنظیم نا نیامٹ جنگ مس و پولیس نا نیام تمنگ آن حالیت آک گیشتر خراب مسر۔ خوانندہ غا تا دزگیریک برجاء ءُ۔
کوئٹہ نا بولان میڈیکل کالج (بی ایم سی) ٹی بلوچ و پختون خوانندہ تنظیم آتا نیام ئٹ جیڑہ آن پد پولیس کالج آ جلہو کرسا کیہی خوانندہ غاتِہ بیدادی آن پد دزگیر کرینے۔
حوال تروکا تا ردئٹ بولان میڈیکل کالج نا ہاسٹل آ کوئٹہ پولیس جلہو کرسا تیبہ ہاسٹل ئے کوزہ کرینے و خوانندہ غا تیا بیدادی و آنسو گیس کاریم ئٹ ہتِسہ ہاسٹل ئٹ ساڑی غٹ خوانندہ غاتِہ کوٹی تیان کشِسہ اوفتے زور ئٹ دزگیر کننگ نا کوشست کننگ ءِ۔
خوانندہ غا تا ردئٹ کالج نا ہاسٹل ئٹ خوانندہ غا تا نیام ئٹ چنکو ویل ئس مسس، ہرادے پولیس جواز جوڑ کرسا ہاسٹل آ جلہو کرے و کیہی خوانندہ غا تِہ دزگیر کرے ہرا نا برخلاف خوانندہ غاک بی ایم سی نا درگہ نا مونا تولوک برانز بناء کریر ہراڑا پولیس کریک ڈاؤن کرینے۔
بلوچ خوانندہ غاک پارینو کہ پولیس منہ زہم تخوکو خوانندہ نا مُخ تفی ئے ہم کننگ ءِ، و بلوچ خوانندہ غا تِہ ٹِک کرسا اوفتا بیدادی کننگ ءِ۔
بلوچ خوانندہ غاک پولیس و کالج انتظامیہ ئے پاش خبڑدار کرینو کہ اگہ خوانندہ غا تِہ نسخان رسینگا گڑا اونا ذمہ وار پولیس و کالج انتظامیہ مرو۔
خوانندہ غاک بلوچستان نا الس آن خواست کرینو کہ او پولیس نا غنڈہ گردی نا برخلاف توار بڑز کیر و دا حالیت ئے وس ئٹ کننگ کن اوڑا زور شاغر۔
خوانندہ غا تا ردئٹ پولیس و انتظامیہ نا پارہ غان اوفتتون بے انصافی ئٹ سلوک مننگ ءِ۔ سکیورٹی لشکر جتا خوانندہ غا تِہ دزگیر کرینے، و آنسو گیس ہم کاریم ئٹ ہیسُنے، ہراٹی بلوچ زالبول و خوانندہ غاک بھاز ٹپی مسنو۔
