حوال تا رد ئٹ لشکری کیمپ آ جلہو ئٹ 16 نا کچ فوجی کھسکنو ہرافتا جونک تربت اسپتال ئٹ تخوک ءُ۔
بلوچستان نا ضلع کیچ ئنا علاقہ دشت کھڈان ئٹی دو شمبے نا نن پاکستانی لشکر نا اسہ کیمپ ئسے آ سلاہ بند بندغ آک جلہو کریر ہراٹی کیہی کارندہ مرگ ئنا گواچی و ٹپی مسر۔
دا تدینی آن گڈ علاقہ ٹی لشکر کشی بناء کننگا ہرا اینو ارٹمیکودے ہم بھلو کچ ئسیٹی برجاء ءِ۔
تربت شار آن اسہ پکو حوال تروک ئس پارینے کہ درو دشت کھڈان ئٹی پاکستانی لشکر نا کیمپ آ عسکریت پسند آتا جلہو ئٹی 16 فوجی کارندہ مرگ ئنا گواچی و کیہیک ٹپی مسنو۔
حوال تروک نا پاننگ ءِ کہ کھئوکا کارندہ غا تیٹ اسہ افسر ئس ہم ارے و جونک تربت نا اسپتال ئٹ تخوک ءُ۔
دا بارث ئٹ دائسکان حکومت بلوچستان و پاکستانی لشکر نا لس حوالکاری شعبہ آئی ایس پی آر نا کنڈ آن دشت کھڈان ئٹی لشکری کیمپ آ جلہو و کارندہ غا تا کھئینگ نا بارث ئٹ ہچو ہیت مونا بتنے۔
ولے علاقہ ٹی بھلو کچ ئسیٹی لشکر کشی آن دا ہیت ئنا گمان ارے کہ کیمپ آ جلہو ئٹ پاکستانی لشکر ئے بھلو کچ ئسیٹی جانی نسخان مسنے۔
اینو ارٹمیکو دے ہم دشت کھڈان و ہیب ئہ کھیب ئنا غُٹ چُنکا بھلا خلق آتیٹ کرفیو ءِ، دکانک و اسکول آک بند ءُ۔ اندن موبائل نیٹورک تون اوار علاقہ نا تہہ و پیشن نا کسرک ہم بند ءُ۔
حوال تروکا تا رد ئٹ پاکستانی لشکر بھلو کچ ئسیٹی اُرا تِہ پٹنگ ءِ و مخلوق ئے بیم ئنا گواچی کننگ ءِ۔
حوال تروکا تا پاننگ ءِ کہ پاکستانی لشکر نا بھلو کچ ئسیٹی لشکر کشی تون اوار ہیلی کاپٹر آک ہم بال کننگ ءُ و جہی مخلوق ئٹ بیم و خُلیس تالان ءِ اندا سوب آن او تینا اُرا تیان پیشتمنگ افس۔
درو لشکر کشی نا وختا پاکستانی لشکر طلال عمر و عامر بلوچ پنیئو اِرا بندغ ہم دزگیر کننگ آن گڈ بیگواہ کریسس ہرافتا دائسکان ہچ ڈس اف۔
اینو برجاء لشکر کشی ٹی دائسکان ہچو دزگیری یا بیگواہی نا حوال رسینگتنے۔
پاکستانی لشکر نا کیمپ آ جلہو نا ذمہ واری ئے دائسکان ہچو تنظیم ئس ہرفتنے۔
