بلوچ نیشنل موومنٹ (بی این ایم) نا بندغی حق آتا ادارہ پانک اکتوبر 2024 نا تینا حوال ئے شنگ کرینے، ہراٹی بلوچستان ئٹی بندغی حق آتا لتاڑ تیٹ گیشتری ئے پھاش کننگانے۔
پانک ئنا اکتوبر نا رپورٹ ئٹی یک سد و دہ زوراکی ئٹ بیگواہی، شش بےقانودی کھسفنگ و بلوچستان نا کیہی جہہ تا لشکرکشی تا حوال تنّنگانے۔
رپورٹ نا رِدئٹ، دا غُٹ تدینی تیٹ پاکستانی لشکر و اونا ایجنسی تا دُو ارے، ہرا خوانندہ، سیاسی جہدکار و لس مخلوق ئے ٹِک کرینو۔
پانک دا تدینی تا افسوس کرسہ پارینے کہ زوراکی نا بیگواہی، بےقانودی خلّنگ و بلوچ مخلوق تون بندغی نا برخلاف چلّنگ پاکستانی لشکر نا بلوچ اُلس ئنا برخلاف زوراکی ئے پھاش کیک، دا بیرہ بندغی حق آتا لتاڑ نہ بلکہ زنک ایسری نا چرجوئی سے ہراڑکن زو ئس جہانی توار نا بکار ءِ۔
پانک ئنا حوال نا حساب آ، اکتوبر 2024 ئٹی بلوچستان نا چھانڑدہ ضلع و کراچی، پنجاپ آن زوراکی نا بیگواہی تا 110 تدینی مسّنے، ہرافتیٹ غُٹ آن زیات بیست و ہفت بیگواہی ڈیرہ بگٹی ٹی مسّنے۔
دا بیگواہی تیٹ گیشتر بلوچ خوانندہ غاک ٹِک کننگانُہ، ہرافتہ پاکستانی لشکر و اونا کمکی ایجنسی تا کارندہ غاک بےقانودی بیگواہ کرینو۔
پانک ئنا رپورٹ ئٹی پاننگانے کہ بےقانودی کھسفنگ ئٹی، پاکستانی لشکر و اونا جہی آ سلاہ بند لشکر (ڈیتھ اسکواڈ) شش بندغ خَلکنو۔ ہرافتیٹ اسہ تدینی ئس یک اکتوبر آ مسّنے، ہراڑے پنجگور نا بنجائی بازار ئٹی پیر جان ئے ریاستی ڈیٹھ سکواڈ نا کارندہ غاک سُم کاری کرسہ خَلکر۔
ہندن شش اکتوبر آ بلیدہ کیچ ئٹی الطاف پِنیئو بندغ ئس کھسفنگا، حوال ئٹی ایلو بےقانودی خلّنگوک آ بندغ آک ہم اوار ءُ۔
پانک ئنا حساب آ دا وخت آ پاکستانی فوج ئنا زوراکی زیات مسّنے، خاص وڑئٹ ڈیرہ بگٹی، کیچ و بارکھان نا ہندآتیٹ پاکستانی لشکر مخلوق نا برخلاف زوراکی کرینے۔ ڈیرہ بگٹی ٹی پاکستانی لشکر و ‘امن فورس’ نا پِن ئٹ چائنگوک جہی آ ریاستی لشکر لس مخلوق ئے بیگواہ کرے و لٹ کُٹ کرسہ خاہوت آتہ تینا اُراتہ، ڈغار تہ الّینگ ہمپنگ آ بیوس کرے۔
پانک تینا حوال ئٹی پارینے کہ اکتوبر نا تُو ئٹی کراچی پریس کلب نا مون آ بیست و شش اکتوبر آ زوراکی نا بیگواہی تا برخلاف امن ئٹ مروکا برانز ئے توننگ کن پولیس و پاکستانی ایجنسیک زوراکی کریر، ہراڑے برانز کروک آتان بھاز آک دزگیر کننگار، اوفتیٹ بلوچ یکجہتی کمیٹی نا راہشون لالا وہاب بلوچ ہم اوار اس، ہرادے پدا عدالت نا پاننگ آ یلہ کننگا۔
پانک پاکستان نا زوراکی تا افسوس کرسہ جہانی مخلوق آن خواست کرینے کہ او داڑا گھام ہفر و دا جنگی ڈوہ تا پٹ ئہ پول ئے کیر۔ ثبوت آک پھاش ءُ داسا جہانی مخلوق ئے پین چُپ مروئی اف۔
