بلوچستان نا ضلع آواران ئٹ نا درست آ سلاہ بند بندغ آک لیویز آ جلہو کرسا اوفتا سلاہ و مڈی تِہ تینتون دریر۔ اندن گوادر ئٹ نادرست آ ٹالر آک کوسٹ گارڈ آ جلہو کرسا میجر تون اوار اِرا کارندہ ٹپی کریر۔
حوال تا رد ئٹ لیویز آ جلہو آواران نا علاقہ گیشکور ہور ئنا سند آ مسنے۔ سلاہ بند بندغ آک ود ئہ کم دہ توفنک تینتون درینو۔
واہم ہچو جانی نسخان نا حوال رسینگتنے و تدینی نا ذمہ واری ئے ہم دائسکان کس ہرفتنے۔
ایلو پارہ غا نا درست آ ٹالر آک کوسٹ گارڈ آ جلہو کرسا میجر ئسے تون اوار اِرا کارندہ ٹپی کرینو۔
گوادر آن رسینگوکا حوال تا رد ئٹ تحصیل اورماڑہ نا دریابی سیم ئٹ کوسٹ گارڈ نا گشتی ٹولی آ سم کاری کننگانے ہراڑان میجر ئسے تون اوار اِرا کارندہ ٹپی مسنو، ہرافتِہ بھاز ٹپی حالیت ئٹ کراچی آ سر کننگانے۔
حوال تروک نا رد ئٹ یک شمبے و دوشمبے نا نیم نن آ اورماڑہ و کلمت نا نیام ئٹ پاکستانی کوسٹ گارڈ نا گشتی ٹولی دریاب ئٹ گجہ ٹرالر آتا برخلاف گشت کننگ اس کہ گجہ ٹرالر آک کوسٹ گارڈ ٹولی آ سم کاری کریر۔
سم کاری نا سوب آن کوسٹ گارڈ نا میجر جلال الدین تون اوار اونا اِرا پین سنگت سپاہی توصیف عمر و ابرار ٹپی مسنو۔
کارندہ و میجر ئے اورماڑہ ٹی بنداوی جانجوڑی کمک فراوان کننگ آن گڈ کراچی آ سر کننگانے۔
