درو پاکستانی لشکر نا چیک پوسٹ آ سلاہ بند بندغ آتا جلہو آن گڈ علاقہ ٹی لشکر کشی بناء کننگانے، بازار و دکانک بند ءُ اندن چھاپہ تا وختا اِرا بندغ زوراکی ئٹ بیگواہ کننگانے۔
حوال تا رد ئٹ پاکستانی لشکر آ درو سلاہ بند بندغ آتا جلہو آن گڈ پاکستانی لشکر علاقہ ٹی لشکر کشی کننگ ءِ و لس مخلوق ئے بیم ئنا گواچی کننگ ءِ۔ اندن علاقہ ٹی موبائل نیٹورک ہم بند کننگانے۔
ہندی حوال تروک ئس زرمبش ئے کہ استو تیبہ نن پاکستانی لشکر ڈرون بال تسنے و اینو جنگی ہیلی کاپٹر و پیدل لشکر علاقہ ٹی سر مسنے۔
حوال تروک نا رد ئٹ درو سلاہ بند بندغ آک چھار کنڈ آن پاکستانی لشکر نا چیک پوسٹ آ جلہو کریسر و جلہو ئٹ پاکستانی لشکر نا کم ئہ ود پانزدہ کارندہ مرگ ئنا گواچی مسنو اندن چیک پوسٹ نا دیوالک تمانو و جانی نسخان تون اوار لشکر ئے مالی نسخان ہم مسنے۔
ہندی مخلوق نا رد ئٹ لشکر کشی نا وختا پاکستانی لشکر اِرا بندغ دزگیر کننگ آن گڈ بیگواہ کرینے۔ بیگواہ کننگوک بندغ آتا چاہنداری دشت کھڈان نا جہی طلال عمر و ابراہیم نا مار عامر نا پن ئٹ مسنے ۔
حوال تروکا تا رد ئٹ طلال عمر ئے استو ننکان دوانزدہ بجہ غا پاکستانی لشکر اونا اُراغان دزگیر کننگ آن گڈ بیگواہ کرینے۔
حوال تا رِد ئٹ درو ننکان پاکستانی لشکر آ سلاہ بند بندغ آتا جلہو آن گڈ تیبہ علاقہ ئے پاکستانی لشکر گھیرہ کرینے و لشکر کشی بنا کرینے۔ اسکول بینک و دُکانک ہم بند ءُ۔ لشکر ہندی بندغ آتِہ ارا تیان پیشن ہِننگ ہم النگ اف۔
کھڈان تون اوار تیبہ دشت ئنا بازار و مشی علاقہ تیٹی پاکستانی لشکر زمینی و بالی لشکر کشی کننگ ءِ۔
علاقہ ٹی موبائل سروس بند مننگ نا سوب آن دا رد ئٹ زیات حوال دو بتنے، ننا حوالکارک دا رد ئٹ ودیک حوال میڑنگ ءُ۔
