کاؤنٹر ٹیررازم ڈیپارٹمنٹ (سی ٹی ڈی) دعویٰ کرینے کہ او انٹیلی جنس حوال ئسے نا بنداو آ آپریشن ئٹ 2 شکبرو بندغ کھسفینے۔
سی ٹی ڈی نا دعویٰ نا ردئٹ خضدار ئٹ نازرک آ ماڑی تیا مننگ کروک جلہو ئے بےسوب کننگ کن کروکا آپریشن ئٹ اِرا بندغ کھسفنگانے۔
کھئوکا بندغ آتا چاہنداری مشکے نا ہندی بار جان و سوراب نا ہندی عبدالخالق نا پِن تیٹ مسنے۔
سی ٹی ڈی نا ردئٹ پن کروک ہڑتُما بندغ آک ہنوکاتم ئٹ قلات ئٹی جلہو تیٹی اوار مسنو۔
سی ٹی ڈی نا ردئٹ آپریشن نا وخت آ شکبر آ بندغ آک سمکاری کریر، ہرا نا سوب آن سی ٹی ڈی ورندی کاروائی کرسا اوفتِہ کھسفے۔
سی ٹی ڈی دعویٰ کرے کہ آپریشن ئٹ لشکری کارندہ غاک تدینی نا ہند آن میگزین تون اوار اسہ SMG، 8 کلوگرام C4 تراکی مواد، اسہ لچفوکو IED، الفا فائر سسٹم، اِرا ریموٹ کنٹرول ڈیوائس، اسہ چغلی بمب ئس، اسہ موٹر سئیکل ئس و اِرا موبائل فون ہم دوئی کرینو۔
یات مرے بلوچستان ئٹ سی ٹی ڈی نا کاروائیک ساندہ مشکوک مسنو، اوڑا دوبہ ءِ کہ او مہالو آن دزگیر مروک بندغ آتِہ کھسفِسہ مونتس نا پِن تیک۔
تدوکا دے تیٹ سی ٹی ڈی دعویٰ کریسس کہ موسیٰ خیل نا ہند آ اسہ مونتس ئسیٹی چھار بندغ کھسفنگانو، پدان ہرافتا خاہوت آک اوفتا چاہنداری ئے کرسا پاریر کہ پن کروک بندغ آک مہالو آن پاکستانی لشکر نا دو آن دزگیر و بیگواہ کننگاسر۔
تدوکا دے تیٹ سی ٹی ڈی نا دو آن کھسفنگوک مُسہ بندغ نا چاہنداری محمد نواز بزدار، غلام بزدار و جعفر مری نا پِن تیٹ مسنے ہرا مُست آن زوراکی ئٹ بیگواہ کننگاسر۔
