وائس فار بلوچ مسنگ پرسنز نا چیئرمین نصراللہ بلوچ تینا درشان ئٹی پارینے کہ زوراکی ئٹ بیگواہ کننگوک عبدالباسط شاہوانی نا حوال تہ اونا باوہ وائس فار بلوچ مسنگ پرسنز ئے تسنے۔
اونا باوہ غوث بخش پارینے کہ اونا مار عبدالباسط شاہوانی ئے فوج ئنا بھلو کچ ئس اینخو دوانزدہ جولائی آ اونا اُرا کلی مینگل آباد، جوہان کراس منگچر آن نن نیمہ غا بےقانودی دزگیر کرسا بیگواہ کرینے۔
اودے اونا مار ئنا بابت ئٹ ہچّو حوال ئس تننگ متنے ہرا نا سوَب آن اونا خاہوت اوڑکن ڈکھیائی ءِ۔
نصراللہ بلوچ پارے کہ تنظیمی تیبر آ غوث بخش ئے پاننگانے کہ اونا مار ئنا کیس ئے حکومت، بیگواہ کننگوک بندغ آتیکن جوڑ مروک کمیشن و اقوام متحدہ نا زوراکی ئٹ بیگواہی تا ورکنگ گروپ ئے سرکننگو و عبدالباسط نا سرسلامت آجوئی کن ہر جہہ آ توار بُڑز کننگو۔
اونا پاننگ اس کہ عبدالباسط ئے بےقانودی دزگیر کننگ و اونا خاہوت ئے بے خبر تخنگ ڈیہہ ئٹی شاری تا بنداوی حق آتا لتاڑ ءِ۔ ہراڑا نن افسوس کینہ و خواست کینہ کہ عبدالباسط آ اگہ دوبہ ئس ارے تو اودے پھاش کرسا عدالت آ ہتیر، اگہ اوڑا ہچّو ڈوہ ئس اف تو اودے زو یلہ کننگِہ و اونا خاہوت ئے مچّا زند ئنا ڈکھ آن آجو کننگِہ۔
