بلوچستان نا شار حب آن ہنوکا تو زوراکی ئٹ بیگواہ کننگوک جنید حمید نا زوراکی ئٹ بیگواہی ئے اسہ تو ئس پورو مسنے، اونا ایلم یاسر حمید نا زوراکی ئے اسہ تو ئس مننگ ءِ ولے او دائسکان آجو متنے، خاہوت پریس کانفرنس کرسا ورنا تا آجوئی نا خواست کرے۔
لسبیلہ پریس کلب حب ئٹی حوالکار تِہ بریفنگ ترسا جنید ولد عبدالحمید نا ایڑ ئنا پاننگ اس کہ 8 اکتوبر 2024 آ شام ئنا دہ بجہ نا وختا حب بھوانی شاہ پمپ ئنا خُڑک آن کنا بھلا ایلم جنید حمید ولد عبدالحمید ئے مُسہ لاری تا کاروان ئٹ سلاہ بند بندغ آک توفک نا زور آ بیگواہ کرسا تینتون دریر۔
او پارے کہ 28 سالی کنا ایلم جنید ولد عبدالحمید حب شہر ئٹی OTsuka پاکستان لمیٹڈ نا ملازم ئس ءِ و ہندی بندغ آک دا شاہدی ئے تیرہ کہ کنا ایلم ہچ وڑ ئنا سیاسی یا پین مذہبی کاریم تیٹی اوار متنے۔
یاتی مرے جنید حمید نا ایلم یاسر حمید ئے 11 اکتوبر 2024 نا نن قلات ئٹی ہموتم زوراکی ئٹ بیگواہ کننگاسس ہراتم او تینا سیال آتا اُراٹی اسک۔ یاسر حمید ئے داکان مُست ہم زوراکی ئٹ بیگواہی نا گواچی کننگانے۔
پریس کانفرنس ئٹی خاہوت نا پاننگ اسک ننا خواست ہندادے کہ حکومت و حکومت نا سیکیورٹی ادارہ غاک جنید و یاسرئے آجو کیر و داڑتون اوار نن بندغی حق آتا ہندی و ڈیہی ادارہ تیان خواست کینہ کہ او دانا نوٹس ئے ہلیر۔
