سلمان بلوچ نا زورکی نا بیگواہی نا برخلاف اینو خضدار ئٹ برانز کننگا۔
حوال تا رد ئٹ اِرا سال مُست شال آن پاکستانی لشکر نا دُو آن بیگواہ مروک سلمان بلوچ نا خاہوت نا کُنڈ آن اینو خضدار ئٹی برانز اڈ تننگا و ریلی ئس کشّنگا۔
برانز ئٹ نرینہ، نیاڑی و چُناک شہید پروفیسر رزاق چوک آن آزادی چوک اسکان ریلی ئس کشّار و زوراکی نا بیگواہی تا برخلاف نعرہ خلکُر۔
برانز ئٹی اسہ وار ولدا پولیس نا بھلو کچ ئسیٹ کارندہ خْواہیفنگا ہندن شار ئٹی موبائل و انٹرنیٹ نا وسیلہ غاک ہم بند کننگار و برانز آن گڈ ملنگار۔
ریلی ٹی زوراکی ئٹ بیگواہ کننگوک سلمان بلوچ نا خاہوت تون اوار زوراکی ئٹ بیگواہ کننگوک آصف و رشید بلوچ نا ایڑ سائرہ بلوچ، چنگیز بلوچ، ذاکر بلوچ و طیب بلوچ نا خاہوت آتتون اوار بلوچ یکجہتی کمیٹی نا باسک آک ہم اوار اسُر۔
برانز ئٹی تران کرسا سلمان بلوچ نا لمّہ پارے کہ کنا مار سلمان ئے اِرا سال مُست ہزار گنجی شال آن زوراکی ئٹ بیگواہ کننگاسس، اِرا سال ئٹی مار ئنا آجوئی کن برانز و عدالت آتیا ہنان ولے سلمان بلوچ ئے نہ آجو کننگا نئے ننے دا پاننگانے کہ اودے انتئے و اَرا ڈوہ ئٹی بیگواہ کننگانے۔
بیگواہ غا سلمان بلوچ نا لمّہ حکومت و بندغی حق آتا ادارہ غا تیان خواست کرے کہ اونا مار ئے پھاش کننگ و آجو کننگ کن گھام ہفر۔
ایلو کنڈ آن بیگواہ کننگوک سلمان بلوچ نا زوراکی ئٹ بیگواہی ئے اِرا سال پورو مننگ آ خاہوت نا کُنڈ آن چاگڑدی حوالکاری میڈیا ایکس (ٹویٹر) آ مہم ئس چلّفنگ نا پڑو مس۔
