بلوچستان ئٹی اسہ وار پدا کاؤنٹر ٹیررازم ڈیپارٹمنٹ (سی ٹی ڈی) دروغ ئنا مونتس ئٹ مُست آن زوراکی ئٹ بیگواہ کننگوک بندغ آتِہ کھسفے۔
تدوکا دے تیٹ سی ٹی ڈی دعویٰ کریسس کہ موسیٰ خیل نا ہند آ اسہ مونتس ئسیٹی چھار بندغ خلنگانو۔
سی ٹی ڈی نا دو آن خلنگوک مُسہ بندغ محمد نواز بزدار، غلام بزدار و جعفر مری نا پن ئٹ درست مسنو ہرا مُست آن بیگواہ کننگاسر۔
دروغ ئنا مونتس ئٹ کھسفنگوک محمد نواز بزدار ئے، ہرا کہ راڑہ شم نا علاقہ برگ پشت ئنا جہی بندغ ئس ءِ، 10 ستمبر آ لورالائی آن زوراکی ئٹ بیگواہ کننگاسس۔
غلام بزدار ئے 21 ستمبر آ راڑہ شم نا علاقہ آن بزدار پٹرول پمپ آن زوراکی ئٹ بیگواہ کننگاسس و جعفر مری ئے راڑہ شم نا اسہ دکان ئسے آن سودا ہلنگ نا وختا 2 اکتوبر آ زوراکی ئٹ بیگواہ کننگاسس۔
خیال ئٹ مرے کہ بلوچستان ئٹی دا اولیکو تدینی اف کہ سی ٹی ڈی نا دو آن زوراکی ئٹ بیگواہ کننگوک بندغ آک کھسفنگانو، داکان مُست ہم دنو کیہی تدینی مسنے ہراڑے سی ڈی ڈی مُست آن بیگواہ کننگوک بندغ آتِہ کھسفِسا مونتس نا پِن تسنے۔
