کیچ: مند مھیر ئٹ مخلوق نا اُرا تیا پاکستانی لشکر نا کوزہ نا برخلاف شش دے آن برانز برجاء ءِ۔ اینو چھار شمبے نا دے بلوچ یکجہتی کمیٹی نا سروک وسیم سفر و ایلو بندغ آک خاہوت تون اواری نا درشانی کن بسر۔
برانز ئنا جاگہ آن بی وائی سی نا سروک وسیم سفر ہیت کرسا پارے کہ داڑے شش دے آن برانز برجاء ءِ زالبول تتون اوار چُنکا چُناک ہم توسنو۔ داڑے برانز ہندا سوب آن کننگانے کہ مند مھیر ئٹی پاکستانی لشکر بندغ آتا اُرا تِہ کوزہ کرینے و دا بندغ آک اُراتیان کشنگانو۔
او پارے کہ پنچ سال آن دا بندغ آک در پہ دری نا زند گدریفنگ ءُ، ہنوکا پنچ سال ئٹی دا بندغ آتِہ پاننگانے کہ نُما اُراک ہورک کننگور ولے دائسکان اوفتیا پاکستانی لشکر نا کوزہ ءِ۔۔ دا بندغ آک بیوس مسنو کہ 1 نومبر آن برانز آ تولوک ءُ۔
وسیم سفر پارے کہ دا برانز ئٹی پیرزال و چُنکا چُناک توسنو ولے دائسکان سرکار نا پاسو آن اوفتا خواست آتِہ مننگ کن ہچ وڑ ئنا گامگیج ہرفنگ متنے۔ ای بلوچ راج آن خواست کیوہ کہ اوفک بلوچستان ئٹی پاکستانی لشکر و اونا ادارہ غا تا زوراکی تیا بے توار مفس۔
