بلوچستان لبریشن فرنٹ نا جارکش میجر گھرام بلوچ تینا شنگ کروک درشان ئٹی پارے کہ سرمچارک 5 نومبر دو شمبے نا نن 8:17 آ تربت سیٹلائٹ ٹاؤن ٹی ڈیتھ اسکواڈ نا کارندہ غفور ئے سم کاری کرسہ مرگ ئنا گواچی کریر۔ دا جلہو ٹی رفیق نا مار صدیق ڈنک نا ہندی و غفور نا مار حسن غفور ٹپی مسر۔
او پارے کہ سرمچارک حکمت عملی نا رِد ئٹ انتظار کریر انتئے کہ ہندا جاگہ غا چُناک گوازی ٹی مشغول اسُر، 30 مِنٹ انتظار آن پد وختس چُناک اوکان ہِنار تو جلہو کننگا۔ ہندا جلہو ئٹی ڈیتھ اسکواڈ نا کارندہ ہمو جاگہ غا خلنگا ولے اونا مار حسن غفور و رفیق نا مار صدیق ٹپی مسُر۔
او پارے کہ راجی مجرم غفور نہ بیرہ بے چاگڑدی کاریم تیٹی اوار اس بلکہ ریاست پاکستان نا جوڑ کروک ڈیتھ اسکواڈ نا سروک ہم اس۔ او کیہی بندغ آتا زور ئٹ بیگواہی و شہیدی ٹی اوار اس۔ حسن غفور پولیس نا نوکر و ڈیتھ اسکواڈ نا کارندہ ئس اسک۔ رفیق نا مار صدیق پی پی پی نا ہندی چیرمین ع منشیات بہا کروک ہوتمان نا کارندہ ئس ءِ۔
جارکش پارے کہ راجی مجرم غفور 1 اگست 2016 آ سیگھک کولواہ ٹی لشکر کشی ٹی حاجی لعل بخش نا مار و بی ایل ایف نا کمانڈر شاہد ندیم نا مخبری ئے کرے و ہندا وختا لشکر کشی ٹی شاہد ندیم شہید مس۔ دا وخت آ بلوچستان نا دُتکی آ وزیر اعلی ثنااللہ زہری اسِہ درشان ئسے ٹی پارے کہ شاہد ندیم ئے نن شہید کرفینُن۔ دا لشکر کشی ٹی پاکستانی لشکر کیہی بندغ آتِہ بیگواہ ہم کریسس۔
او مُستی پارے کہ دا ڈوہدار کیہی ورنا تِہ زوراکی ئٹ بیگواہ کرفسہ اوفتا خاہوت آتِہ بلیک میل کرینے کہ اوفک لشکر کِن کاریم کیر، زوراکی ئٹ بیگواہ کننگوک ورنا تا باوہ تِہ بیوس کرینو کہ اوفک سرمچار آتا حوال ئے دشمن لشکر ئے سر کیر۔
جارکش پارے کہ راجی ڈوہدار کیہی بندغ آتِہ سرینڈر کرفینے و لشکر کِن کاریم کرینے۔ تنظیم دا راجی ڈوہدار ئے 2014 ٹی دزگیر کرے و خبڑدار کرسا یلہ کرے ولے او ہنگہ تینا کاریم تِہ یلہ کتہو۔
او پارے کہ جلہو ٹی ٹپی مروک رفیق نا مار صدیق غفور نا سیال و ہوتمان نا ایڑھ ئنا مار اصغر تون بے چاگڑدی کاریم تیٹی اوار مسنے۔ غفور نا مار حسن غفور پولیس نا نوکر و ڈیتھ اسکواڈ نا کارندہ اسک۔
او پارے کہ بی ایل ایف مُچ ڈیتھ اسکواڈ نا کارندہ غا تون اوار حسن غفور و صدیق غفور ئے خبڑدار کیک کہ اوفک دا کاریم ئے یلہ کیر، بلوچ چاگڑد ئٹی بے چاگڑدی کاریم تیٹی مخبری ہچ وڑ ئٹ قبول اف۔
جارکش پارے کہ بلوچستان لبریشن فرنٹ دا جلہو نا زمہ واری ئے ارفک و آزاد بلوچستان اسکان ریاست نا لشکر و اونا کارندہ غا تِہ ٹِک کُننگ نا عزم ئے کیک۔
