دہن مف کہ بروکا پیڑیک بلوچ راج ئنا راست انگا مسخت ئے گیرام کیر۔
تنظیم نا جہدکارک، دوستخواک، بلوچستان نا چاگڑدی و بندغی حق آتا جہدکار تہ بلوچستان نا آجوئی نا جہد ئے غُٹ آن بُڑز سرپند مروئی ءِ، انتئے کہ ننا ویل آتا روتہ بلوچ راج ئنا غلامی ءِ و داڑان پیشتمنگ نا کسر آجوئی آن ویتہ پین ہِچ اف۔
دا خْیال آتا درشانی ئے بی این ایم نا چیئرمین ڈاکٹر نسیم بلوچ بی این ایم نا چھارمیکو بنجائی دیوان ئٹی تینا بِنائی تران ئٹی کرے۔
او پارے کہ تنظیم نا باسک آک و دوستخواک بلوچستان ئٹی مروکا تدینی و ایلو راج دوست تاغت آ تِہ لازم کمک تیر و اوفتہ درستی کرفر ہرا بلوچ و بلوچستان نا مفاد ئٹی ءُ۔ ولے نن کن دا غُٹ پد ئنا گِڑا ءُ و آجوئی نا جہد اولیکو مسخت مروئی ءِ۔ بی این ایم نا باسک آک غُٹ آن مہالو تینا پروگرام تون سلسہ اونا مون آ دنّنگ کن کاریم کیر۔
چیئرمین پارے کہ ننے ارٹمیکو تیبری نا معاملہ و راست انگا مسخت نا فرخ ئٹی گھٹ مروئی اف۔ دہن مف کہ پد ئنا معاملہ غا تِہ مون آ ہتنگہ و بروکا پیڑی تینا جہد ئنا بنیات ئے اُست آن دے۔ بلوچستان نا آجوئی نا خواست کروکو سیاسی جماعت ارے ہرافتیٹ وطن ئٹی یا پیشن بی این ایم غُٹ آن زیات جہد ئٹی ءِ۔ ہندا سوَب آن ہرا تاغت آک بلوچ راجی آجوئی نا تحریک ئے سوگو ہُننگ خواہیرہ اوفتہ بی این ایم نا کمک و آجوئی نا پروگرام ئے مون آ دنّنگ ئٹی کاریم کروئی ءِ۔
بی این ایم نا چیئرمین پاکستان ٹی جمہوری طرز ئنا سیاست نا بےسوبی آ پارے کہ پاکستان ‘بلوچ راجی مُچی’ ئے توننگ خواہا، چھار بلوچ شہید کننگار۔ پی ٹی ایم نا جرگہ ئے توننگ نا کوشست کننگا اوڑے ہم چھار پشتون شہید مسر۔ برانز و دھرنا تان پد ہم بلوچستان ٹی زوراکی ئٹ بیگواہی تہِ زیات کننگا۔ پنجاپ ئٹی کیہی بلوچ خوانندہ غا تِہ زوراکی ئٹ بیگواہ کننگا و پاکستان ہمو توار تہ شیف کننگ خواہیک ہرا دا ظلم آتا برخلاف بش مریرہ۔
ڈاکٹر نسیم بلوچ دا زوت ئنا گڑاس تدینی تا ہیت کرسہ پارلیمانی سیاسی جماعت آتا ہم تنقید کرے، او پارے کہ مہالو بی این ایم آن ہرّفنگاکہ کِہ او بلوچی زبان کن انت کننگ ئٹی ءِ۔ اینو بی این ایم بلوچی زبان و ادب نا شون ئکن کاریم کرینے ولے ہمو سیاسی جماعت آک ہرا پارلیمانی سیاست کیرہ او انت کننگ ئٹی ءُ۔ کم آن کم او گڑاس ہندنو کاریم کیر ہرافتا بلوچ راج ئے فائدہ مرے۔ گوادر ٹی خواجہ سید ظہور شاہ ہاشمی نا بُت ئے پرغنگا۔ سید ظہور شاہ ہاشمی بلوچ راجی ادب ئٹی بھلو پِن ئس ءِ، ہمر کہ سیاست ئٹی خواجہ خیربخش مری و شہید اکبر خان بگٹی۔ ولے ہچّو ادبی و غیر ادبی تنظیم ئس داڑا برانز کتّو۔ ہندن پنجگور ئٹی شہید اکبر خان بگٹی نا بُت ئے بٹنگا داڑا ہم گام ہفّنگتو۔ دا معاملہ آتا ہمو جماعت آتا ہرا تینا خُلکن آ بیانیہ ئٹ بلوچستان نا زمین نا سیاست ئٹی ساڑی ءُ، اوفتہ جوان وڑئٹ گام ہرفوئی اسّک۔
