وائس فار بلوچ مسنگ پرسنز نا چیئرمین نصراللہ بلوچ تینا شنگ کروک بیان ئٹ پارینے کہ زوراکی ئٹ بیگواہ کننگوک اسامہ پندرانی نا کوائف ئے خاہوت وی بی ایم ئے تسنے۔
اونا پاننگ اس کہ خلیل الرحمن تینا ایلم نا زوراکی ئٹ بیگواہی نا شابیت حوال تِہ تنظیم ئے ترسا پارے کہ ریاستی ادارہ غا تا کارندہ غاک کنے 22 اگست 2023 آ جامعہ مسجد قلات آن دزگیر کریر و کنے پاریر کہ تینا ایلم اسامہ ئے فون کرسا پار کہ او جامعہ مسجد قلات آ برے۔ ای ایلم ئے تینا فون کرسا خواہفیٹ۔ اسامہ تون اوار کنا ایلو ایلم ہم بس و نن ہر مُسہ ایلم تِہ ریاستی ادارہ غا تا کارندہ غاک گاڑی ٹی سوار کرسا دریر۔ زرس مُستی ہِننگ آن پد ننے تومکا ایلم تِہ دا پارِسہ الار کہ اسامہ آن گڑاس سوج کننگ آن گڈ اودے یلہ کرون ولے اسہ سال ئس گدرینگ آن پد ہم اودے یلہ کتنو ہرا نا سوب آن ننے اسامہ نا زند ئنا بارث ئٹ بھاز خلیس ءِ۔
اسامہ نا ایلم نا پاننگ اس کہ دُن مف کہ ریاستی ادارہ غاک اودے نسخان ایتر ہرا نا سوب آن ننا خاہوت بھاز ذہنی کرب و اذیت نا گواچی ءِ۔
نصراللہ بلوچ پارے کہ تنظیمی تیبر آ خاہوت ئے باور تسن کہ اسامہ نا کیس ئے حکومت، بیگواہ کننگوک بندغ آتیکن جوڑ کروک کمیشن و اقوام متحدہ نا زوراکی نا بیگواہی تا ورکنگ گروپ ئے ایتون و اونا سرسلامت آجوئی کن ہر تلہ غا توار بڑز کرون۔
