بلوچ لبریشن آرمی نا جارکش جیئند بلوچ میڈیا غا شِنگ کروک تینا درشان ئسیٹی پارے کہ بی ایل اے نا سرمچارک نوشکی قادر آباد ئٹی کوزہ گیر پاکستانی لشکر نا کاروان ئے اسِہ جلہو ئسیٹی ٹِک کریر، جلہو ئٹی کوزہ گیر لشکر نا کم آن کم دہ کارندہ مرگ ئنا گواچی کرین، لشکر تون دو پہ دو جنگ ئٹی بی ایل اے نا اِرا سرمچار دلیری ئٹ جنگ کرسہ شہید مسر۔
جارکش پارے کہ تِدوکا دے ئنا دونزدہ بجہ غا بلوچ لبریشن آرمی نا سرمچارک نوشکی آن پنچ کلومیٹر نا مُری آ قادر آباد نا ہند آ کوزہ گیر پاکستانی لشکر نا کاروان آ جلہو کرین، کم آن کم جلہو ٹی لشکر نا 10 کارندہ خلکُن و چھار ٹپی مس۔
او پارے کہ کوزہ گیر لشکر تون جنگ ئٹی بلوچ لبریشن آرمی نا اِرا سرمچار عدنان بلوچ و یاسر بلوچ لُمہ وطن نا دلیری ئٹ دفاع ئے کرسہ شہید مسر۔ شہید عدنان بلوچ دشمن تون جھڑپ ئٹی سُم کُنگ و ٹپی مس ولے ٹپی حالیت ئٹی تینا سنگر ئے یلہ کتو، اسِہ ساعت اسکان جنگ کرسا تینا یونٹ ئے سرسوبی ئٹ کسر کرسا جام شہادت نوش کرے۔
جارکش پارے کہ کوزہ گیر لشکر آ دا جلہو ئٹی بی ایل اے پین اسِہ سرمچار یاسر بلوچ دشمن تو دو پہ دو جنگ ئٹی ٹپی مس و دشمن ئے بے سوب کرسا و اسِہ رکھوکو جاگہ ئس سر مس ولے بھاز دتر ہِننگ نا سوب آن شہید مس۔
او پارے کہ وزیر احمد نا مار شہید سنگت عدنان بلوچ عرف سفر نوشکی کلی مینگل نا ہندی ئس اسک۔ شہید آئی آر ٹی بی ایس نا خوانندہ ئس اسک، شہید عدنان بلوچ 2023 نا اول ٹی بی ایل اے ٹی اوار مس۔ او راجی آجوئی کن اسِہ شاری گوریلہ ئسے نا حیثیت ئٹ ہم کاریم کرے۔ دا وخت آ او نوشکی شار و خُڑک ئٹ جتا کاریم تیٹی تینا لائخی تا عملی درشانی ئے کرے، لشکر ئے کیہی کاری دک خلک۔ او دلیری، جیرت مخلصی نا جوانو مثیل اِلّسہ دشمن ئے کیہی جنگ آتیٹی بے سوب کرسا آخیر ئٹ دلیری ئٹ شہیدی ئے تینا پنا کننگ ئٹ سرسوب مس۔
او پارے کہ لال جان نا مار شہید یاسر عرف ماسٹر سفر خان خضدار مولہ نا ہندی ئس اسک۔ 27 سالی آ یاسر بلوچ میکنیکل انجینئر ئس اسک۔ او 2018 ٹی بی ایل اے ٹی اوار مس و راجی غلامی نا برخلاف شاری و مشی محاذ آتا تینا فوجی خذمت آتِہ شان تِس۔ سنگت یاسر بلوچ بولان، ناگاہو، و شور پاردو (قلات) ئٹی کیہی اہم محاذ آتا بخش ہلِسہ دشمن لشکر ئے بے سوب کننگ ئٹ کڑدار ادا کرے۔ او مخلصی، دلیری و جفاکشی ئٹ تینا نن و دے ئے بلوچ راجی آجوئی کہ تس۔ او بی ایل اے نا اسِہ دلیر و زہینو سپاہی ئس اسک۔
او پارے کہ بی ایل اے شہید سنگت یاسر بلوچ و شہید سنگت عدنان بلوچ نا جیرت، بہادری و بلوچ وطن تون وفاداری نا اعتراف ئے کرسا، شہیدی آ اوفتِہ خیسُنو دروت ندر کینہ۔ ہندا عزم ئے کینہ کہ بی ایل اے تینا شہید آتا عظیم آ کڑد آتیان بے خیال مفک، اوفتا کربانی تا بدل ئٹ راجی آجوئی ئے دوئی کرون۔
