حوال تا رد ئٹ بلوچستان نا ضلع موسٰی خیل، ضلع اواران و ضلع کیچ آن پاکستانی لشکر مُسہ بندغ زوراکی ئٹ بیگواہ کرینے۔
حوال تا رد ئٹ بلوچستان نا ضلع کیچ آن استو ننکان پاکستانی لشکر اسہ بندغ ئس دزگیر کننگ آن گڈ بیگواہ کرینے ہرا نا برخلاف خاہوت سی پیک کسر ئے بند کرسا برانز کننگ ءِ۔
بیگواہ کننگوک بندغ نا چاہنداری ماسٹر عصاراہی نا مار سہراب راہی نا پن ئٹ مسنے ہرادے استو پاکستانی لشکر کیچ ئنا علاقہ شہرک نا ہند آ چھاپہ خلِسہ بیگواہ کرینے۔
ہندی حوال تا رد ئٹ نن ئنا دو بجہ غا پاکستانی لشکر بھلو کش ئسیٹ علاقہ ئے گھیرہ کرے و اُراغا چھاپہ خلِسہ پن کروک بندغ نا باوہ و ایلو بندغ آتیا بیدادی کرے و اودے تینتو درے ہراکان گڈ او بیگواہ ءِ۔
تدینی نا برخلاف شہرک نا ہند آ خاہوت سی پیک روڈ ئے بند کرسا برانز بناء کرے۔
اندن ضلع موسیٰ خیل نا علاقہ راڑہ شم ئٹی پاکستانی لشکر درو ننکان اُرا غا چھاپہ خلِسہ اسہ بندغ ئس دزگیر کننگ آن گڈ بیگواہ کرینے۔
بیگواہ کننگوک بندغ میر احمد بزدار نا مار محمد خان نا پن ئٹ درست مسنے۔
حوال تا رد ئٹ موسیٰ خیل و چمالنگ نا علاقہ تیٹ پاکستانی لشکر نا بھلو کچ ئسیٹی سُر پُر خننگ مسنے۔ راڑہ شم و ہیب ءَ کھیب آن بھلو کچ ئسیٹ بندغ آک زوراکی ئٹ بیگواہ کننگانو ہرافتا شابیت حوالک دائسکان دو بتنو۔
ایلو کنڈ آن حوال رسینگانے کہ پنجگور نا ہندی بندغ ئس ضلع آواران آن زوراکی ئٹ بیگواہ کننگانے۔
بیگواہ کننگوک بندغ عبداللہ نا مار نظام بلوچ نا پن ئٹ درست مسنے۔
پن کروک بندغ ئے 1 نومبر 2024 آ پاکستانی لشکر آواران آن دزگیر کننگ آن گڈ بیگواہ کرینے۔
