نوشت: مہر دل بلوچ
مَٹ: بچکند بلوچ
خلیل جبران نوشت کیک ہراتم نے کس ئنون بھاز کُڑمب مابت مرے، نی او مابت ئٹ دہن گوئنگِسہ کہ زند ہمو بابت نا مریک۔ کنا عشق ئنا کسہ ہم کنے ہندن لگیک کہ ہراتم آن عشق بولان ٹی تمانُٹ ہمونا مسونُٹ۔ دا اَسہ ہندنو عشق ئس ءِ ہرا نہ وختی ءِ ،نہ موسمی بلکن دا ہر وخت ہر موسم ٹی کنا زند ئنا اِیلو کل معاملہ تیا زور ءِ۔
بولان نا بُڑا آ، رنگی آ و زیبا، سنگلاخ مَشک بلوچ راجی مزاحمت نا بنجاہ نا حیثیت تخیرہ۔ تینا زیبائی ٹی نازاں، شہید آتا دِتر آن معطر بولان تینا زیباغا قلعہ نا وڑ آ چٹان تا کُنڈ آ کنے ہندن چھکیک ہمر کنے تینا خُمب ئٹ ہلنگ کن بےجارات مرے۔ بس اُست پائک کہ رُمب کیو کاو و تینا عشق، بولان نا زیبائی ئے ہلِسہ وطن نا شہزادہ تا کاروان تون گھام خلیو۔
ای عشق بولان ئٹی جنون نا اَسہ کیفیت ئسیٹی اُٹ کہ جہان نا ہر کُنڈ ئنا رنگ آک کنا نظر ئٹ بے رنگ خننگرہ۔ بس ہندا عشق ئٹی اَسہ ہندنو تڑپ ئس ارے کہ تینا زند ئے ہندا عش ئنا پِن آ کیو۔ دا عشق ئکن ای داخس حساس اُٹ کہ اوڑان بیدس زند بے معنی لگیک۔ بولان ئے خیال آتیٹی ہتِسہ اونا زیبا غا ندارہ غا تا عکس کشی کرسہ کنا داسہ ننک دا مون ہمیون مرسا گدرینگیرہ۔
دا عشق ئٹی جنون نا ازحد کیفیت وار وار آ کنے سوچنگ آ بیوس کرے کہ داٹی انتہا نا فوقیت انتکن ارے ہرانا سوب آن جہان نا پین گِڑا ئسیٹ کنے کشش نظر بفک کہ دا ہم فطرت نا مظاہر ءُ۔
ای بھاز وخت سوچِوہ کہ داعشق ئنا پد ئٹ کنا بے رونق حالیت آکو کہ ہرانگا زند کُل آسراتی تیان پد تموک ءِ، ہرانگا نفسا نفسی نا عالم ءِ، ہرانگا ہرکس نا زند زاتی ویل آ تے اِسکان سلوک ءِ، ہرانگا مہر و مابت بیرہ لوز ءُ۔ ای دا مفروضہ ئے ذہن ئٹی ہلِسہ پینتین ہنِسہ پر رونق حالیت آ تیٹ رہینگاٹ ہرانگا زند ئنا کُل آسراتیک اسُر، بکار آتیان زیات ہر گِڑاک، ولے آسراتی اراڑے و عشق بولان اراڑے۔
وار وار آ سوچنگ آن پد ہچ وخت عشق بولان آن بیدس پین رنگینی تے ذہن ئٹی جاگہ تتوٹ و ای مسلسل دا مَلاس ئٹی اُٹ کہ اَراتم بولان ئے سر مریو و سیراب مریو۔ بس ہندا اُست خواہی ءِ کہ زند ئے ہندا عشق ئنا پِن آ کیو ہراٹی تینا دائمی وجود ڈھکوک ءِ، ہراٹی تینا بقاء نا دھارہ ءِ، ہراٹی تینا تہذیب نا شیبائی ءِ، ہراٹی تینا ٹیوار نا پاسبانی ءِ، ہرٹی وطن نا مِش تا گند ءِ، ہراٹی وطن نا ہر کُنڈ ئنا انسیت و مابت خننگیک۔
