بلوچستان نا ضلع کیچ ئنا علاقہ مند مہیر ئٹ اُرا تیا پاکستانی لشکر نا کوزہ نا برخلاف نیاڑی تا برانز اینو چھارمیکو دے برجاء سلیس۔
برانز کروک نیاڑی تا رِد ئٹ ایف سی زور ئٹ تِدوکا پنچ سال آن ننا اُرا تیا کوزہ کرینے و تینا کیمپ جوڑ کرینے، اولی دے آن اینو اسکان نن ہندی انتظامیہ، میر و متعبر آتیان خواست ہم کرینُن کہ ننا اُراتِہ ہورک کننگ کن ننے کُمک کبو ولے پنچ سال گِدرینگا واہم ریاست زوراکی و توفنگ نا زور آ ننا اُراتِہ الِپک۔
اوفک پاریر کہ اینو برانز ئٹ تولوکا خاہوت نا بندغ آتِہ چھار دے پورو مس ولے ہندی انتظامیہ ناکُنڈ آن خاہوت ئے انصاف رسینگتو۔ خاہوت نا خواست آتیٹی ہچو گھامگیج ئس متنے اینو ہندی میر و متعبر آک برانزی تِہ خلیفنگ کِن کسر ئے ٹریکٹر ئٹ ملِنگ نا کوشت ئے کرسا برانز کروک نیاڑی تتون گندہ ءُ زبان کاریم ئٹ ہیسر ہرا نا مذمت ئے کینہ و انتظامیہ ئے خبڑدار کینہ کہ برانز آ تولوک آتِہ اگہ گڑاس مس تو دانا زمہ وار ہندی انتظامیہ مرو۔
