بلوچستان نا دریابی شار گوادر نا ہند جیوانی روبار نا ہندی عبدالباسط ئے 26 اکتوبر 2024 نا شام شاہین نا شکار کننگ نا وختا 25 سم خلِسہ کھسفنگا۔ اونا خاہوت نا پاننگ ءِ کہ دانا پد ئٹ ہندی منشیات مافیا نا دو ارے۔
عبدالباسط نا ایلم نیاز احمد اسہ ایف آئی آر ئس نوشت کرفے ہراٹی مننگ کروک ڈوہدار تا پن تِہ ہلک ہرافتیٹ پیری نا مار جان محمد، نذر، عطا محمد نا مار و مراد محمد نا مار رحیم بخش اوار ءُ ہرا ربڑ جموری نا ہندی ءُ۔
نیاز احمد نا رد ئٹ زمین نا جیڑہ خون ئنا سوب مننگ کیک، واہم خاہوت ئے ہندی منشیات نا کاروبار تون کڑمبو تعلقداری نا شک ءِ، اوفتا رد ئٹ مننگ کروک ڈوہدارک ہند ئٹی منشیات بہا کننگ و تالان کننگ ئٹی تُد ءُ۔
او پارے کہ نن کالخواہ تیان دا ڈوہدار تا نیٹ ورک آتِہ ایسر کننگ و زمہ وار تِہ انصاف نا تلہ غا ہتنگ کن زوت کاروائی نا خواست کینہ۔ عبدالباسط نا خاہوت بندش نا خواستگار ءِ، و بلوچستان نا مخلوق رکھ و انصاف نا خواستگار ءُ۔
دا تدینی آن پد جہی مخلوق نا پاننگ ءِ کہ دا تدینی بلوچستان ئٹی ڈوہداری تیٹ تُد نیٹ ورک آتا بے مہار بُڑز ہِننگ نا پیدواری ئے کیک۔ اگہ ریاستی تاغت گیشتر سیاسی باسک آتا برخلاف کاریم ئٹ ہتنگ مریک ولے دا ڈوہداری تیٹ تُد ٹولیک معافی تون کاریم کیرہ۔
