حب چوکی ٹی پاکستانی لشکر اسہ بندغ ئسے دزگیر کننگ آن پد نادرست آ جاگہ غا درے۔
حوال آتا رِد ئٹ 22 اکتوبر آ ننکان پاکستانی لشکر حب شار اللہ آباد ٹاؤن آ اُرا ئسے آ چھاپہ خلِسہ ظفر گیشکوری پنیئو بندغ ئسے دزگیر کننگ آن پد تینتون درے۔
حوال تروکا تا رِد ئٹ محکمہ ماحولیات نا ملازم ظفر گیشکوری ئے پاکستانی لشکر دزگیر کرینے ہراکان گڈ اونا ہچ ڈس اف۔
بلوچستان ئٹی زوراکی ئٹ بیگواہی تا تدینی برجاء ءِ۔ درونا دہ خوانندہ راولپنڈی آن زوراکی ئٹ بیگواہ کننگانو، داکان مُست اکتوبر آ زوراکی ئٹ بیگواہ کننگوک بندغ آتا کچ 80 آن تدینگانے۔
اکتوبر نا توُ ئٹی بلوچستان نا شار حب چوکی آن دا وخت آ شش بندغ نا بیگواہی نا حوال رسینگانے۔ حوال تروکا تا پاننگ ءِ کہ بیگواہی تا کچ گیشتر ءِ۔ ولے خُلیس و تڑی تِس آن کیہی خاہوت میڈیا نا مونا بتنو۔
ایلو کنڈ آن بلوچستان تون اوار پاکستان نا ایلو شار تیٹی زوراکی ئٹ بیگواہی تا برخلاف برانز آتا لڑ برجاء ءِ۔ برانزیک بلوچستان ئٹی زوراکی ئٹ بیگواہی تا ایسر کننگ و بیگواہ غا بندغ آتا آجوئی نا خواست کننگ ءُ۔
