مستونگ بمب تراک و خلنگ مروکا تیکن شاری تا برانز، انصاف نا خواست۔
بلوچستان نا ضلع مستونگ نا ہندیک اینو سہب ئنا کوئٹہ کراچی کسر آ برانز کریر، برانزیک درو نا دے مستونگ ئٹی مروکا بمب تراک ئنا تدینی نا برخلاف برانز ریکارڈ کریر۔
مستونگ برانز ئٹی شاریک و بمب تراک آن زیمی مروکا بندغ آتا خاہوت آک اوار مسُر و تدینی تا برخلاف سخت نعرہ خلکر۔
برانز ئنا سوب آن کوئٹہ کراچی راجی کسر ئے ٹریفک کن بند کننگا۔
دا وختا برانزی تا پاننگ اسک کہ ہنوکا دے بمب تراک ئٹی اسکول نا چُناک ساہ تسُر و مستونگ ئٹی دُننگا تدینی تا مننگ و وار وار مننگ بلوچ نسل کشی اسہ افسوس ناک ءُ عمل ئس ءِ و سرکار دا رد ئٹ غیر زمہ واری نا درشانی کننگ ءِ۔
برانزیک حکومت و کالخواہ تیان خواست کریر کہ اوفک تدینی نی ذمہ وار بندغ آتا زوت پیدواری ئے کرسا اوفتا برخلاف کاروائی کیر، نہ تو نن سخت برانز آ بیوس مرون۔
یاتی مرے کہ ہنوکا دے بلوچستان نا ضلع مستونگ ئٹی سول اسپتال و گرلز اسکول چوک آ پولیس موبائل نا خُڑک آ تراک ئٹی اسکول نا پنچ چُنا تیتون نُہہ بندغ خلنگا و 15 آن زیات ٹپی مسُر۔
مستونگ نا ہندی و بلوچ سیاسی تنظیم آک دا تدینی ئے بلوچ نسل کشی پارسا جہانی ادارہ تیان خواست کریر کہ اوفک دُننگا تدینی تے توننگ کن گامگیج ہرفیر۔
