بی ایس او آزاد نا بنجائی ترجمان پارینے کہ بلوچ راجی آجوئی، بندغی شرف ئنا بُڑزی و خطہ ٹی پاکستانی دہشتگردی نا برخلاف بلوچ راجی شہید آک ہرا قربانی تہ تسّنو او دیہاڑ ئٹی گچین آ لوز آتیٹ یات کننگور۔ او شہیدی نا جوزہ نا فکر آ دھڑنگسہ ہرا سند آ سرمسُر اونا ہچّو بدل اف۔ بلوچ راجی دیہاڑ، دود، ٹیوار (شناخت) و بقا نا رکھ کن بلوچ راجی شہید آتا قربانیک دیہاڑ نا پنّو آتیٹ پہَو مسّنو ہرافتہ کسّس ڈھرفّنگ کپک۔ بلوچ شہید آک تینا جند ئنا اُست ئنا مراد آتہ استان درسا بھلّو مسخت ئسے کن ہرا قربانی تہ تسّنو او بلوچ راج ئکن کسر نا چراغ ءُ۔ اوفتہ دروت ندر کینہ و دا سوغند ئے ہفّنہ کہ بلوچ ورناک تینا راجی شہید آتا فکر ئٹ جہد کرسہ زوت یا ہُرے آ بلوچ ئے راجی آجوئی نا مزّل آ سرکرور۔ بلوچ شہید آتا قربانیک آجوئی نا جنگ، بندغی نا شرف، رکھ و انصاف نا وڑئٹ یات کننگور۔ او تینا جند ئنا خواہش آتہ الِسہ راجی جہد ئٹی اوار مسر و ساندہ زندہ مننگ نا فلسفہ ئے گچین کریر و تینے دیہاڑ ئٹی سرسوب کریر ہندن بلوچ راج ئے اونا بروکاتم ئنا راست انگا کسر ئے نشان تسر۔
غُٹ دنیا نا زندہ و شرفدار آ راج آک تینا شہید آتا قربانی تا سوَب آن اینو دا ہند آ سلوک ءُ، بلوچ راج اینو زور ئنا کوزہ گیری نا زمزیر ئٹی تفنگانے ولے بلوچ شہید آتا قربانی و اوفتا فلسفہ بلوچ راج ئے اینو اسہ زندہ ؤ راج ئس جوڑانے۔ اوفتا قربانیک اینو بلوچ راج ئٹی اسٹی و اواری ودی کرینو و دشمن نا کُل چم تہ بےسوب کرینو۔ دشمن بلوچ راج ئے پرغنگ کن علاقئی، مذہبی، قبائلی، دیہاڑی و سیاسی وڑ ئٹ مُری ودی کرے تاکہ بلوچ راج ئنا تہٹی ناٹہی ودی مرے و بلوچ مخلوق تین پہ تین نا برخلاف سنگر ہلے، ولے بلوچ شہید آک تینا دتر ئٹ ہرا اواری و فکر ئنا پیدَواری ئے کریر اینو او ہر بلوچ ورنا نا اُست ئٹی جہہ کرینے۔ کوہِ سلیمان آن ہلیس کرمان اسکان بلوچ شہید آتا دتر نا خوشبو بلوچ راج ئٹی اواری، پُہہ و سرپندی ئے گیشتر کنّنگ ئٹی ءِ۔ بلوچ شہید آک تینا دتر ئٹ ہرا سوچ ئے بھلُن کریر اینو او چُھنا چُھنا نا دتر ئٹ دورہ کننگ ءِ۔ بلوچ شہید آک تینا بےمٹّ آ قربانی تیان ہرا دیہاڑ ئے الّار او لازم بلوچ راج ئے مزّل آ سرکننگ نا وسیلہ مرو، و بلوچ راج دنیا نا ہمو بھلّا، تاغتی آ، گشاد تخوکا و سرسوب آ راج آتیان اسٹ مرو ہرا دنیا نا سواد و شون ئنا کاریم ئٹی بشخ ہلیرہ۔ شہید آتا نشان تروکا کسر بلوچ راج ئکن کسر نا چراغ ءِ اوڑ ئٹ ہنسہ زوت بلوچستان آن پاکستان نا زورئنا کوزہ ایسر مرو۔
ترجمان مُستی پارے کہ بلوچ شہید آتا قربانی آ اوفتہ دروت ندر کننگ کن تنظیم غُٹ ہنکین تہ دیوان اڈ تننگ نا فرمان کیک ہندن تنظیم نا کنڈ آن سینزدہ نومبر بلوچ شہید آتا دے “نمیرانی ءِ فلسفہ ءُ 13 نومبر” (شہیدی نا فلسہ و سینزدہ نومبر) نا سرحال ئٹ اسہ کتابُک (کتابچہ) ئس شنگ کننگو ہراٹی بلوچ شہید آتا فکر ئنا بنداو آ تروکا قربانی تا درشانی نا کوشست کننگو۔ ہندن بلوچ دیہاڑ نا دا بھلّا دے آ شہید آتا خاہوت و اوفتا سنگت آتہ کُلہو تینہ کہ اوفتا تیناک (شہید آک) ہمو بھلّا بندغ آتیان ءُ ہرا تینا دتر ئٹ ننا دیہاڑ ئے زندہ تخانو و دنیا نا زورآور آ دشمن تیان ننے رکھانو۔ تینا شہید آتیا فخر کبو، اوفتہ دا دے آ دروت ندر کننگ کن اوفتا یاتگار ہند آتیا ہنبو و دنیا ئے اسہ زندہ ؤ راج ئس مننگ نا دْروشم ئے گچین نشان ایتبو ہرا ننا شہید آتا ارمان مسّنے۔ سرسوبی بلوچ راج ئنا مرو ہرا دہنو دلیرو چُھنا ودی کرینے۔
