بلوچ لبریشن آرمی نا ترجمان جیئند بلوچ میڈیا غا شنگ کروک تینا درشان ئٹی پارینے کہ بلوچ لبریشن آرمی نا یونٹ فتح اسکواڈ نا سرمچارک درو شام ئنا پَنجگُور ئٹی بی ایل اے نا انٹیلی جنس زراب (ZIRAB) نا تروکا انٹیلی جنس معلومداری تا بنیات آ پروم، دزگٹ ئٹی پاکستانی لشکر و ڈھکوک ادارہ تا جوڑ کروکا ڈوہداری کروک بندغ آتا ٹولی پِنی آ ڈیتھ اسکواڈ نا ٹھکانہ آ اَسہ بھلو جلہو ئس کریر۔
او پارے کہ سرمچار تا جلہو ئٹی چھار ڈیتھ اسکواڈ کارندہ ہموتم کھسکُر ہراتم اوفتا اَسہ سنگت ئس تینا سلاہ ئے خَسہ نرا۔ کھئوکا کارندہ تا سلاہ و اِیلو لشکری مڈی تِہ سرمچارک تینا کوزہ ٹی ہلکر۔
جارکش پارے کہ ہموتم سرمچار تا اَسہ پین دستہ ئس جلہو نا جاگہ غا مُستی گھام خلوک پِنی آ ڈیتھ اسکواڈ نا بھلا بجار شمبے زئی نا ایلم ظاہر شمبے زئی ئے جلہو ئٹ ٹک کریر، ہرانا سوب آن او ہمو ہند آ کھسک اونا اِرا سنگت ٹپی حالیت ئٹ نَرار۔
او پارے کہ سرمچارک ہندا ہند آ استحصالی پروجیکٹ نا اِرا کریش پلانٹ و اِیلو کُبینا سلاہ تون اوار ٹھکانہ ئے ہُشیسہ تیبہ تباہ کریر۔
او پارے کہ پنجگور نا ہند پروم ئٹی مَنہ راجی غدار تینا ذاتی سواد آتا خاطر آن کوزہ گیر لشکر و ڈیتھ اسکواڈ نا کمکار جوڑ مسُنو، و بلوچ راجی تحریک نا برخلاف متحرک ءُ، و دشمن ریاست پاکستان نا لشکر کن مخبر و کمکار نا کاریم ئے کننگ ءُ ۔ دا گندہ غا کاریم تیٹ بلوچ ورنا تا مخبری، دشمن لشکر کن راشن سر کننگ، ڈھکوک ادارہ غا تا افسر تِہ تینا ذاتی آ لاری تیٹ ٹرانسپورٹ تننگ، دشمن لشکر کن کیمرہ و سولر سسٹم خَلنگ نا وڑو سہولت کاری اوار ءِ۔ دا کُل بلوچ دشمن کاریم تِہ بیرہ لشکری کاروباری تعلقداری نا پِن ئٹ کننگ ءُ۔
ترجمان پارے کہ پنجگور ئٹی منہ خاسو بندغ ” لائن“ نا پِن ئٹ معصوم آ بندغ آتِہ دشمن لشکر کن مخبری آ بیوس کننگ ءُ۔ ہندا بندغ آک لشکر کن آسراتی تننگ نا انعام ئٹ لائن چارج مسُنو، گولڈ سمڈ لائن آ تیل ئنا کاروبا کننگ کن دشمن لشکر اوفتِہ اسٹیکر تیک۔ ہندا بندٖ آک لس بلوچ آتا معاشی بیوسی تیا سواد ہرفِسہ اوفتِہ مخبری نا عیوض ئٹ اسٹیکر نا لالچ تیرہ۔ مَنہ غیر سلاہ بند مخبر آک شکار، چکر و مال تا رکھ ئنا نیمون ئٹ مَش تیا مون کیرہ و سرمچار تا ٹھکانہ و کسر تا خبر کننگ ئٹی اختہ مریرہ۔
او پارے کہ بلوچ لبریشن آرمی پھاش پائک کہ ننا انٹیلی جنس ونگ ہندا کُل بندغ تیا نظر تخنگ ءِ، اگہ ہندا بندغ تیان کس تینا راج دشمن کاریم تیان پدی متو گُڑا عبرتی آ ایسر آ سر کننگ مرو۔
اونا ودیک پاننگ اس کہ بلوچ لبریشن آرمی نا سرمچارک کیچ ئنا ہند ہوشاب تل ئٹی مُسہ دے مُست اَسہ کاروائی ئس کرسا مقصود باوہ نا پِن گواران سکنہ ہوشاب تل سر ئے دزگیر کریسُر۔
او پارے کہ ہندا مخبر و کمکار سرسوج نا وختا مَناسس کہ او پاکستانی لشکر نا کرنل میران تون ہوشاب کیمپ ئٹ اوڑدئی کریسس و اونا پاننگ آ پدا پِنی آ ڈیتھ اسکواڈ نا کارندہ شہداد ولد بہروزنا بھلُنی ٹی مخبر و کمکار نا وڑ کاریم کننگ اسک۔
جیئند بلوچ پارے کہ مخبر مقصود منّا کہ او ہمدڑدی نا دروشم ئٹ سرمچار تا راشن ئٹی ” ٹریکنگ چِپ“ ڈھکِسہ سرمچار تا کیمپ اِسکان سرکریسس، ہرانگا دژمن لشکر جنوری 2023 ٹی اَسہ ڈرون جلہو ئسیٹ سرمچار تا کیمپ ئے ٹک کرسا جلہو نا بناء کرے و دژمن تون جھڑپ آ تیٹ سنگت تنظیم نا مُسہ سرمچار عامر خان عرف عابد جان، یحیی جان عرف کمبر جان، رضا عرف گزین و بی ایل اے نا سنگت ممتاز ولد قاضی عرف ملا یاسر جام شہادت نوش کریسُر۔
او پارے کہ مخبر و کمکار مقصود تینا ڈوہ تِہ مَننگ تون اوار تینا اِیلو سنگت آتا پِن تِہ پارینے۔ راجی غداری کروک، بلوچ راجی عدالت نا فیصلہ نا رد ئٹ پاکستانی لشکر نا کمکار مقصود ئے سرمچارک کھسفیر، زراب نا ہندی نیٹ ورک اِیلو مخبر تا رند ئٹ ءِ ،ہرافتِہ زوت اوفتا ایسر اسکان سر کننگ مرو۔
توجماب پارے کہ بلوچ لبریشن آرمی نا سرمچارک اینو سہب ئنا کوئٹہ نا ہند کلی قمبرانی ٹی انٹیلی جنس نا بنداو آ کاروائی ئسے نا وختا کوزہ گیر لشکر نا ڈھکوک ادارہ ملٹری انٹیلی جنس (ایم آئی) نا اَسہ کارندہ سید حان ولد کریم بخش بگٹی ئے سُمکاری کرسا کھسفیر۔
او پارے کہ پاکستانی لشکر نا ملٹری انٹیلی جنس نا کارندہ سید حان کوئٹہ ٹی کوزہ گیر لشکر کن مخبری تون اوار بندغ آتِہ ڈھکوک ادارہ ٹی بطور مخبر بھرتی کننگ ٹی اوار اسک۔ہندا آلہ کار نا اصل جاگہ محمد کالونی سوئی ڈیرہ بگٹی اسک ساڑی آ جاگہ کوئٹہ کلی قمبرانی ٹی اسک۔
اونا پاننگ اس کہ کُل معلومداری و شاہدی تیان پد بلوچ لبریشن آرمی نا سرمچارک اینو سہب ئنا کلی قمبرانی کوئٹہ ٹی پاکستانی لشکر نا کمکار سید حان ئے سُمکاری کرسا کھسفیر و اونا سلاہ تِہ ہم دوئی مسر۔
او ایسر ئٹ پارے کہ بلوچ لبریشن آرمی دا جلہو تا زمہ واری ئے ہرفک و پھاش پائک کہ بلوچ راجی تحریک و مفاد آ تا برخلاف ہرکس متحرک مرو چاہے اونا تعلقداری ہرا راج،نسل مذہب و ٹَک آن مرے، اوفتِہ اَسہ دشمن و غدار نا ایسری انجام آ سر کننگ مرو۔
