بلوچ نیشنل موومنٹ نا مُسکوہی جنرل سیکریٹری و بلوچ رہشون رحیم بلوچ ایڈووکیٹ چاگڑدی میڈیا نا سائیٹ ایکس آ پوسٹ ئس کرسا پارے کہ بی بی ایمان زینب مزاری ایڈووکیٹ و عبدالہادی ایڈووکیٹ نا برخلاف ایف آئی آر کننگ و اوفتا دزگیری، قانود و اختیار تا رد انگا کارمرز نا مذمت نا لائخو کاریم ئس ءِ۔
او مُستی پارے کہ او ہڑتُما نروکو ڈوہدار افس ہرافتِہ پولیس دزگیر کرینے بلکہ شرفدارو شاری و پنیئو وکیلءُ ہرافک مقدمہ تیکن ہڑدے عدالت آ تیا کارہ۔ ہڑتُما تِہ دزگیر کننگ اصل ئٹ ریاستی پالیسی تیا نغد کاری کروک و مخالف تا توار ئے توننگ نا غیر جمہوری پالیسی تا پیدواری ءِ، انتئے کہ ایمان مزاری بندغی حق آتا لتاڑ، خاصیکا زوراکی نا بیگواہی تا ریاستی پالیسی تا برخلاف اسہ تاغت تخوکو توار ئس ءِ ہرا نہ بیرہ سیاسی پِڑ و میڈیا ٹی زوراکی نا بیگواہی تا زمہ وار ریاستی ادارہ غا تا برخلاف کوکار کیک بلکہ عدالت آ تیٹی اوفتِہ گِھر کیک۔
او پارے کہ اندازہ خلبو کہ اسلام آباد آن بار انگا شار اقتدار ئٹی بی بی ایمان مزاری و عبدالہادی ایڈووکیٹ نا وڑ پنی آ ہستی تِہ پولیس اسہ بے بنیات و چنکو مقدمہ ئسیٹی دزگیر کرسا تنگ کننگ نا کوشست کیک گُڑا کوزہ مروکا بلوچستان نا مُر انگا مشی آ علاقہ، چنکا خلق و ہند آتیٹی پولیس، فوج، ڈکھکوک ادارہ غاک و اوفتا اڈ تروکا سلاہ بند ٹولیک انت انت زوراکی کرور۔
