شال: کماش بلوچ راہشون واحد کمبر بلوچ ئے ایران آن زوراکی ئٹ بیگواہ کننگ نا برخلاف اونا مسڑ مہلب کمبر بلوچ نا ساڑی گری ٹی بلوچستان ہائی کورٹ ئٹی پٹیشن کننگا، ہرادے عدالت منِّسہ ذمہ وار حاکم آتا نوٹس مون تِس۔
مہلب بلوچ نا پاننگ اس کہ عدالت وزارت خارجہ، قبائلی امور و اسلامی جمہوریہ ایران نا قونصل جنرل ئے دا رد ئٹ حوال تنّنگ کن عدالت آ خْواہنگ مسنے، ہرا بروکا پیشی آ عدالت آ برور او دا جیڑہ غا ہیت کرور۔ استاد واحد کمبر نا مسڑ شاری کمبر بلوچ دا کیس ئنا پیروی ئے کننگ ئٹی ءِ۔
یات مرے استاد واحد کمبر بلوچ، بلوچ تحریک نا پِنیئو راہشون ئس ءِ ہرادے پاکستانی ادارہ غاک 19 جولائی 2024 آ ہمسایہ ڈیہہ ایران آن زوراکی ئٹ بیگواہ کرینو۔
مہلب تینا باوہ نا زوراکی نا بیگواہی نا رد ئٹ پریس کانفرنس ئٹی پارینے کہ داکان مہالو 14 مارچ 2007 آ ہم پاکستانی ایجنسی تا ادارہ غاک پولیس نا کمک ئٹ استاد واحد کمبر ئے اونا سنگت آتتون دزگیر کرسا نُہہ تُو اسکان بیگواہ کریسر۔ داخس سزا جاہ تیٹ تخنگ آن پد ہم پاکستانی ریاست اوڑا دہشت گردی نا دوانزدہ کیس خلسہ اودے سی آئی ڈی پولیس نا حوالہ کرے۔ گُڑا او مونا ہتنگا و پاکستانی عدالت آتیٹ اوڑا مقدمہ ہم کننگا۔
او پارے کہ کنا باوہ ئے 2011 ٹی عدالت دا دروغ ئنا مقدمہ آتیان آجو کرے۔ اوکان پد ہم ریاستی ادارہ غاک اونا سیاسی فکر ئنا سوَب آن اودے پریشان کننگ خْواہار، پاکستانی لشکر ننا اُرا تیا چھاپہ خلک و اُرا تیا خاخری آ سِلاہ تیٹ جلہو کرے۔ دا حالت کنا باوہ ئے تینے اندر کننگ آ بیوس کرے و او اسہ بھلو وخت ئس ڈھکوک رہینگا۔
مہلب بلوچ نا پاننگ ءِ کہ دا وختا او جانجوڑی رد ئٹ نزور مسّنے، اُست ئنا ناجوڑی تون اوار او کیہی ناجوڑی تا گواچی ءِ۔ ہندا سوَب آب او تینا سْیال آتا کمک ئٹ دے کہی بلوچستان آ ہنا ہراڑے اودے علاج کن ایران نا شار کرمان آ دنّنگا۔ علاج ئٹ زیات وخت لگنگ نا سوَب آن اونا رہینگ نا ہم ہمو شار ئٹی بندوبست کننگا تاکہ اودے ڈاکٹر آتا ہِننگ آ اڑزانی مرے۔ 19 جولائی 2024 آ کنا باوہ واحد کمبر سودا ہلّنگ کن اُرا غان خُڑک ئنا دکان آ ہناسس ہراڑے اسہ پژو فارس پِنیئو پیہُنو رنگ ئنا ایرانی گاڈی سیٹ چھار بندغ بسر و کنا باوہ ئے زوراکی ئٹ تینا گاڈی ٹی سوار کننگ نا کوشست کریر۔ کنا باوہ سَرپُٹ کرے و خُڑک ئنا دکان دارک ہم یام تمّار ولے اوفتہ ہم بیہار ترسہ مُر کننگا و کنا باوہ ئے بیگواہ کنّنگا۔
اونا خاہوت مُستی پارے کہ استاد واحد کمبر نا کس ئتو ذاتیئو دشمنی ئس اف، او بلوچ جہد ئٹی مسّنے ہندا سوب آن نن پاننگ کینہ کہ اودے پاکستانی ریاست نا ادارہ غاک تینا کارندہ غا تا کمک ئٹ زوراکی ئٹ بیگواہ کرینو۔ او اسہ ہفتاد و چھار سال ئنا کماشو بندغ ئسے ہرا کیہی ناجوڑی تا گْواچی ءِ۔ اوڑا پاکستان ئٹی ہچّو مقدمہ ئس اف، او مُست ئنا غُٹ دروغ ئنا مقدمہ آتیان آجو مسّنے۔ ہندا سوب آن اونا جانجوڑی ئے ہُرسہ اودے زو ئس یلہ کننگہ۔
