بلوچ اسٹوڈنٹس ایکشن کمیٹی نا ترجمان تینا شنگ کروک بیان ئٹ پارے کہ تنظیم نا مُسکوہی زونل زمہ وار و دلیر آ سیاسی باسک سنگت حمیدہ بلوچ نا کذیت کننگ آ ننے ڈکھ ءِ۔ سنگت حمیدہ بلوچ تنظیم نا اوتھل زون نا مُسکوہی نائب صدر مسُنے و خوانندہ سیاست ئٹی عملی کڑد ادا کرسا بلوچ خوانندہ غاتِہ سیاسی تربیت نا جُہد ئٹی متحرک اس۔ او لمز اوتھل آن پولٹیکل سائنس نا شعبہ ٹی گریجویشن کریسس، اونا بنیاتی تعلقداری آواران نا ہند تیرتیج آن اسک۔ سنگت سیاسی باسک تون اوار اَسہ جوانو نوشتکار ئس اسک۔ نن اونا چُنکا زند ئٹ کروکا سیاسی جُہد ئے قدر ئٹ ہُرِسہ اودے دروت ندر کینہ۔
او پارے کہ سنگت حمیدہ تُدوکا مَنہ سال آن کینسر نا ناجوڑی نا گواچی اسک و کراچی نا اسپتال ئٹی علاج تَہ مننگ اسک۔ دا ناجوڑی نا سال تیٹ او تینا زند و مرگ ئنا چک ءَ تاڑ ئٹی دا جہان فانی آن ہنا۔ ناجوڑی نا سال تیٹ ہم اونا راجی جیرت و جوزہ بُڑز اسک او پاریکہ تیبہ علاج آن پد او راجی جُہد ئٹ ولدا بشخ ہلو۔ دا سخت آ حالیت آ تیٹ ہم اونا راجی جوزہ و فکر آن سرشار مَننگ سوگو راجی شعور و فکر ئنا پیدواری ءِ۔
اونا پاننگ اس کہ بلوچستان ئٹی گچینو اسپتال و جانجوڑی سہولت آتا وے مننگ آن بلوچ راج دلیر آ ورنا و دلیر آ سیاسی جُہدکار تیان محروم مننگ ءِ۔ کینسر نا ناجوڑی بلوچستان ئٹی تیزی ئٹ ودی مننگ ءِ ہرادے توننگ کن نہ کینسر اسپتال و نئے کہ پوسکُنا آسراتیک اریر۔ بلوچستان نا حالیت آک دُہن ءُ کہ کینسر نا ناجوڑی و ایلو چُنکا بھلا ناجوڑی تا علاج ہم منکن اف ہرانا سوب آن لائخ آ ورناک زند آن محروم مننگ ءُ۔ اگہ ننتون جوان و پوسکنا جانجوڑی نا آسراتیک مسرہ گُڑا ننا ورناک دُہن مرگ ئنا گواچی متورہ۔
اونا پاننگ اسک کہ تنظیم سنگت حمیدہ بلوچ نا جہد و فکر ئے دروت ندر کیک، اونا کڑد، فکر و زند ئنا گڈیکو ساہت آ تیٹ راجی سوچ تون اوار مرسا بلوچ و بلوچستان آن مابت ورنا تا جُہد و جیرت کن روشنو کسر ئس ءِ۔
