پاکستان نا بنجائی شار اسلام آباد نا آبپارہ پولیس، سرکار نا کاریم تیٹی دو سخت کننگ نا دوبہ ٹی پنی آ وکیل و بندغی حق آتا باسک ایمان مزاری ئے اونا اُرا خواجہ تون اوار دزگیر کرے۔
ایمان مزاری و اونا اَرغ وکیل ہادی علی نا کنڈ آن روٹ ئنا برخلافی کننگاسس و ہڑتُما تا برخلاف کیس ہم مسس۔
پولیس نا رد ئٹ دا وختا ایمان مزاری نا کنڈ آن پولیس کارندہ غا تِہ دِکہ تننگ تون اوار خراب زبان ہم کارمرز کننگاسس۔ پدا اَرغ زائیفہ پولیس نا کنڈ آن خلوکا ہڑاند آتِہ تینٹ کشیسہ ہناسر۔
دا رد ئٹ ایمان مزاری نا پاننگ اسک کہ پولیس کارندہ غا تا پاسو آن اوفتِہ اخلاق آن پیشنو ہیت پاننگاسس و ہڑاند آتِہ اوفتا زیہا بٹیسر۔
یات مرے کہ منہ دے مُست ایمان مزاری و اونا اَرغ نا ویڈیو چاگڑدی حوالکاری میڈیا غا تالان مسس ہراڑے پاکستان نا دورہ غا بروکا انگلینڈ کرکٹ ٹیم کن کسرتِہ بند کننگاسس و اوفتا پولیس تون تلخ کلامی مسس، او کسر آ خلوک ہڑاند آتِہ مُر کننگ آ ہم خننگ مسُرہ و پولیس نا کنڈ آن ہڑاند آتِہ ایمان مزاری آ بٹنگ نا عمل ہم خننگ مسکہ۔
اسلام آباد پولیس تدینی آن پد پاریسس کہ دا جوڑہ سرکاری مہمان تا رکھ کن مروکا ایس او پیز تا برخلافی کرینو و اوفتا بر خلاف سرکاری کاریم ئٹی دو سخت کننگ نا کیس کننگو۔
ایمان مزاری ئے انصاف نا محتاج بندغ آتا کُمک کن ہنوئی اسک، او زوراکی نا بیگواہی، زالبول تیا بیدادی و ظلم ئنا برخلاف ہم توار بُڑز کرسا مسنے۔
