بلوچ یکجہتی کمیٹی نا بنجائی ترجمان تینا شنگ کروک بیان ئٹی پارینے کہ ریاست پاکستان ویتہ ہچو سختو ثبوت تننگ آن بلوچستان ئٹی سیاسی کاریم کروکا تا برخلاف انسداد دہشت گردی نا قانود آتِہ پھاش کاریم ئٹ ہتنگ ءِ۔ دا پھاش وڑ ئٹ پرایمن السی و سیاسی کاریم تِہ دہشت گردی تون گھڈینگ ءِ ہرا کہ اسہ نوآبادیاتی کاریم ئسے تون اوار نسل پرستی ئس ءِ۔ دا وڑ، ریاست باسک آتِہ ٹک کننگ ءِ و کیہی بلوچ و پشتون سروک، سیاسی کاریم کروک، استاد، خوانندہ و ایلوفتِہ ’ممنوعہ بندغ آتا لڑ‘ ئٹی اوار کرینے۔ لڑ ئٹ اوفتا پِنک اوار مننگ نا سوب آن اسہ بندغ ئسے نا بنداوی حق، اندن کہ تحریک، تران و آجوئی نا درشانی، مُچی، رازداری، و پہریا و پیشہ نا حق آن پد تمک، ہرا نا ضمانت ریاستی راہبند (آئین) و جہانی قانود (UDHR، ICCPR) آک تیرہ۔
او پارے کہ اندا زوت ئٹ، ریاست بی وائی سی نا سروک ڈاکٹر ماہ رنگ بلوچ و شاہ جی صبغت اللہ بلوچ نا پن تِہ کالعدم بندغ آتا لڑ ئٹ اوار کرینے۔ NACTA نا پن ئنا IV شیڈول، ہرا بلوچ زنک کشی نا برخلاف بلوچستان ئٹی اونا سیاسی کاریم تیان خلیس ئے پھاش کیک۔
اونا ودیک پاننگ اس کہ ڈاکٹر ماہ رنگ بلوچ داسا اسہ جہانی کارکن ئس جوڑ مسنے ہرا بلوچستان ئٹی بندغی حق آتا سخت لتاڑ، اندن کہ زوراکی نا بیگواہی و قانود نافذ کروکا ایجنسی (LEAs) تا ذریعت ئٹ کروکا بیدس عدالت خون تا برخلاف پرایمن کاریم تیکن پِنی ءِ۔
ترجمان پارے کہ UNHRC و ایمنسٹی انٹرنیشنل کون آ جہانی تنظیم آتیان ہم سیاسی کاریم کروکا تا برخلاف انسداد دہشت گردی نا قانود آتِہ کاریم ئٹ ہتنگ آ فریشانی نا درشانی کرینے، و حکومت آن خواست کرینے کہ اوفتا پن تِہ دننگا لڑ تیان کشنگِہ ہرا اوفتا بنداوی حق آتِہ لتاڑِرہ۔
او پارے کہ ریاست بنداوی حق آتِہ توننگ و برجاء زنک کشی ئے تیز کننگ کن تینا عزم ئٹ سوگو خننگک۔ دیہاڑ شاہد ءِ کہ سامراجی تاغت آتا کنڈ آن دا وڑ ئنا چم بازیک بھاز کم وخت کن مسنو و پرایمن کاریمک و مزاحمت ساندہ سرسوب مریک۔ بلوچ راج ئنا جہد تینا بقاء کن ءِ و ہموتم اسکان برجاء مرو ایسکان کہ بقاء نا ضمانت رسینگپک۔
