بلوچستان نا بنجائی شار شال ئٹی زوراکی نا بیگواہی تا برخلاف برجاء برانزی کیمپ ئے 5618 دے مس۔
اینو نیشنل پارٹی نا ایم پی اے کلثوم نیاز بلوچ، سعدیہ بلوچ، مسکوہی سینیٹر مہیم خان بلوچ و ایلوفک بسر اواری نا درشانی کریر۔
وی بی ایم پی نا وائس چیئرمین ماما قدیر بلوچ پارے کہ تینا حق آتیک جہد و وطن نا رکھ کن توار ہفّنگ آ ہندنو ظلم و زوراکی مننگ ئٹی ءِ کہ یزید ہم شکّی مرے۔ زوراکی ئٹ پاکستانی ریاست جہانی قانود آتہ لتاڑیک و مچّٹ ئس ہم پد سلپک، ہندن پار کہ بےمہار پاکستانی ریاست ئے ہر وڑ ئنا بنداوی بندغی حق آتا پابندی آن آجو کننگانے۔
او پارے کہ پنجگور، خاران تون اوار اکتوبر نا بنائی دے تیٹ ڈیرہ بگٹی، مستُنگ، مشکے و بھاز آ جہہ تیا لشکرکشی ٹی بمباری و ڈغاری جلہو تیان چُنا نیاڑی تتون اوار بھاز آ بندغ آتِہ بیگواہ کننگانے۔
ماما قدیر بلوچ پارے کہ ننا کچ و حساب نا رد ئٹ مُسہ تُو ئٹی پنچ سد آن گیشتر بندغ بلوچستان آن بیگواہ کننگانو، کراچی و پنجاپ آن بلوچ خوانندہ غا تِہ ہم بیگواہ کننگانے۔ بلوچ اُلس آ لشکری زوراکیک زیات منّنگ تون اوار، خواننگ و جان جوڑی نا ادارہ غا تیا ہم پاکستانی لشکر نا کوزہ برجا ءِ، ہراڑے جہی مخلوق ئے خْوار کننگک۔
او پارے کہ زوراکی نا بیگواہی و جون خسّنگ نا لڑ ہم برجاء ءِ۔ بلوچ راج ئنا برخلاف ریاستی کارندہ غاک تینا زوراکی تِہ گیشتر کرسہ اُرا تیٹ پیہرہ و نہاڑی آ گِڑا تِہ و زر آتِہ ہفّرہ دیرہ پدا اسہ رنگ بھتہ خواہیرہ۔
