کیچ/گوادر: پاکستانی لشکر نا اذیت جاہ تیان اِرا بندغ آجو مسنو اندن اسہ بیگواہ کننگوک بندغ ئس پھاش کرسا سی ٹی ڈی نا دوٹی تننگانے۔
حوال تا رد ئٹ بلوچستان نا ضلع کیچ آن درو پاکستانی لشکر نا دو آن زوراکی ئٹ بیگواہ کننگوک دولت واحد بخش ہرا تجابان سنگ آباد نا ہندی ئس ءِ آجو مسنے۔
پن کروک بندغ ئے درو پاکستانی لشکر نیمروچ آ دزگیر کننگ آن پد بیگواہ کریسس ہرا استو آجو کننگانے۔
ہندا وڑ گوادر آن پاکستانی لشکر نا دو آن بیگواہ کننگوک اسہ ورناس آجو مسنے۔
آجو مروک بندغ نا چاہنداری حسین نا مار عجاز نا پن ئٹ مسنے ہرادے پاکستانی لشکر 28 ستمبر آ گوادر آن پین چھار ہمراہ تون اوار دزگیر کننگ آن پد بیگواہ کریسس۔
حوال تا رد ئٹ عجاز آجو مسنے ولے اوڑتون اوار بیگواہ کننگوک نور بخش نا مار محراج سی ٹی ڈی نا دوٹی تننگانے و حمزہ نا مار ایوب، خالد نا مار دودا و یعقوب نا مار زاکر دائسکان بیگواہ ءُ۔
