بلوچ نیشنل موومنٹ (بی این ایم) نا ترجمان تینا شنگ کروک بیان ئٹی پارینے کہ گجر مشکے ٹی پاکستانی لشکر نا کِرائی آ خون خور آک تنظیم نا ہُرے نا دوزواہ عبدالحق/جنگی خان و لیاقت/ نیکسال ئے ٹِک کرسا شہید کرینو۔ خلنگوک عبدالحق جنگی خان ئے پاکستانی لشکر بھاز وار دزگیر کرے و زوراکی ئٹ بیگواہ کرے و دا وختا اودے بھاز بیدادی تا ہم گواچی کرے۔
ترجمان پارے کہ شہید عبدالحق نا آجوئی دوست خاہوت تنظیم نا ہمدڑد ءِ، دا خاہوت دشمن نا غُٹ زوراکی تیان پد ہم جہد آن مُر مننگ نا جہہ آ قربانی نا فلسفہ ئے تینائی کرے و اونا نہاد ئے پُھر کرے۔
او پارے کہ شہید عبدالحق نا خاہوت نا بندغ آک مشکے نا مَش تیٹ رہینگوکو میژدار اسر۔ پاکستانی لشکر 21 جنوری 2016 ٹی منجو مشکے ٹی عبدالواحد جنگی خان و دلشاد میر محمد رحیم محمد حسنی ئے خَلک کھسفے، و غُٹ اُرا تہ لُٹنگ آن پد ہُشا۔ اوکان پد پاکستانی لشکر نا جلہو و چھاپہ خلّنگ بند متَو۔ وار دم ئنا جلہو تیان جغر چُٹ مرسا دا خاہوت تینا باوہ پیرئی آ علاقہ و روزگار ئے اِلا و پروار مشکے آ ہنا ولے زوراکی و تادیک داڑے ہم سلتور۔
ترجمان پارے کہ پروار مشکے آ بننگ آن گڈ پاکستانی لشکر دا خاہوت ئے وختس سدھا تو وختس تینا کِرائی آ خونی تا ذریعت ئٹ ٹک کننگ بناء کرے۔
14 جون 2018 ٹی پروار مشکے ٹی پاکستانی لشکر تینا کِرائی آ کارندہ غا تا زریعت ئٹ جلہو کرفسہ مبارک/لشکری و محبت خان/مبارک ئے خَلک و نورالحق ئے ٹھپی کرے۔ 30 جون 2023 آ جونگو مشکے ٹی پاکستانی لشکر نا کارندہ غاک محمد عیسیٰ جنگی خان ئے کھسفیر و اونا چُھنکا مار سمیر ئے ٹھپی کریر۔ 21 اکتوبر 2024 آ گجر مشکے ٹی دا خاہوت نا کماش عبدالحق جنگی خان و لیاقت نیکسال ئے خَلکُر کھسفیر۔ عبدالحق سال ئس مُست تینا خاہوت آ مروکا زوراکی تا کسہ ئے بنفیسس ہرادے ‘زْرمبش نیوز’ شنگ کرے، او وخت آ شہید عبدالحق فوجی کیمپ آتا نیام ئٹی رہینگاکَہ ہمو سوَب آن او تینا ویڈیو ٹی خْیال ئٹ ہیت کرے، واہم زوراکی و زوراکی کروکا تا پیدَواری مننگ کیک۔
بی این ایم نا ترجمان پارے کہ شہید عبدالحق آن بار انگا ہزار آ خاہوت آک پاکستانی لشکر نا زوراکی تا گْواچی ءُ ولے پاکستان تینا سخت انگا زورآوری آن پد ہم آجوئی نا جہد آن مخلوق نا اُست خْواہی ئے چُھٹّفنگ کپک۔
