بلوچ یکجہتی کمیٹی نا کنڈ آن “چُپی ئے پرغنگ، زوراکی نا بیگواہی تا برخلاف بش مننگ” نا سرحال ئٹ بلوچستان نا جتا شار تیٹ برانز آک برجاء ءُ۔
اندا رد ئٹ اینو پنجگور ئٹ برانزی ریلی کشنگا ہراٹی بھلو کچ ئسیٹی مخلوق اوار مس۔
ریلی شہید جاوید چوک آن پیشتمِسہ شار ئنا جتا جہہ تیٹ پھیری کرے۔ برانزیک بیگواہ کننگوک بندغ آتا عکس آتِہ ہرفیسر و ریلی ٹی چُنا نیاڑی تا بھلو کچ ئس اوار اس۔
برانز نا وختا اوفتِہ پولیس و انتظامیہ نا کنڈ آن فریشان کننگا و بیم ئنا گواچی کننگا ولے برانزیک غٹ ہڑاند آتہ سر کرسا ریلی ئے برجاء تخار۔
برانز کروکا پاریر کہ پنجگور انتظامیہ ریلی ٹی اوار مروکا زالبول تِہ فریشان کننگ نا کوشوت کرے ہرا نا مسخت برانزی تِہ خار تننگ اس واہم نن ایمنی ئٹ تینا برانز ئے برجاء تخون۔
او ودیک پارے کہ داکان مُست ہم ہرا علاقہ تیٹ برانز کننگانے اوڑے پولیس ہڑاند ودی کرسا شار ئٹ موبائل سروس آتِہ بند کرینے اینو ہمو کاریم تِہ پنجگور ئٹی ہم کریر۔
