بی ایس او نا مسکوہی چئیرمین و بی این ایم نا مسکوہی سیکریٹری جنرل رحیم بلوچ ایڈوکیٹ چاگڑدی حوالکاری میڈیا ایکس آ تینا بیان ئس شنگ کرسا پارے کہ ریاستی دہشتگردی، بے انصافی و زوراکی نا برخلاف بیگواہ کننگوک بلوچ فرزند آتا خاہوت آتا توار ئے توننگ نا پاکستان ہرا نہار کون آ پالیسی تِہ تینائی کرینے دادے مُچا جہان خننگ ءِ۔ ای دا ریاستی دہشتگردی و زوراکی آ پاکستان آن ہچو گلہ کپرہ انتئے کہ گلہ تینا تیان کننگک یا ہلہ مہذب و جمہوری چاگڑد و ڈیہہ تیان کننگک ولے پاکستان نہ ننا تینا ءِ و نئے کہ او جمہوری و مہذب ڈیہہ و چاگڑد ئس ءِ۔ ولے بلوچ زالبول، چُنا، ورنا و پیر انگا تتون پاکستان نا دا نہار کون آ روشت نا مذمت ئے کننگ، دا نا برخلاف توار بڑز کننگ و جہد کننگ ننا کُل ئنا فرض ءِ۔
بلوچ سروک تینا بیان ئٹ پارے کہ بلوچ قومی تحریک آجوئی نا سلاہ بند محاذ ئنا ودوکا تاغت و آپریشنل لائخی تیان کوزہ گیر ریاست ئے رسینگوکا تکلیف، فریشانی ڈھکوکو ہیت ئس اف ولے تحریک نا جمہوری محاذ، بندغی حق و آجوئی تا رکھ ئنا جہد آن، کوزہ گیر پاکستانی ریاست ساندہ خلیس نا گواچی مسنے۔ ریاست نا دا خلیس نا سوب دادے کہ تحریک نا جمہوری محاذ السی مُچی، کانفرنس و برانز آتا ذریعت ئٹ نہ بیرہ کوزہ مروک بلوچستان ئٹی پاکستانی لشکر و ڈھکوک ادارہ تا زوراکی و بلوچ زنک کشی ئے پھاش کننگ ئٹ اہم کڑدار ادا کننگ ءِ بلکہ السی موبلائزیشن و جہان نا پام ئے ہم دوئی کننگ ئٹ دا نا بھلو کڑد ئس ءِ۔ بلوچ تحریک نا جمہوری محاذ نا السی موبلائزیشن کوزہ گیر ریاست نا دا دروغ و رد تروکا بیانیہ ئے ہم پھاش کیک ہراٹی ریاستی نمائندہ غاک و میڈیا گیشتر بلوچ قومی تحریک آجوئی ئے ” اسہ مٹھ ئس بندغ“ یا ”منَہ شونداری مخالف سڑدار“ نا شرپسندی پارِسہ ریاست نا کالونیل ہاٹی، کڑد و لُٹ ءَ پُل ئے ڈھکنگ نا کوشست کیرہ۔
بیگواہ کننگوک بندغ آتا آجوئی کن وائس فار بلوچ مسنگ پرسنز نا برانزی کیمپ ئے وار وار آ ہُشنگ یا بیگواہ کننگوک بلوچ آتا خاہوت آتِہ پریس کانفرنس، مُچی و برانز تیان توننگ کن پولیس گردی و بیدادی کون آ فسطائی چم بازی تِہ کاریم ئٹ ہتنگ نا مسخت اوفتِہ خلیس نا گواچی و است ہسون کننگ یا ہلہ اشتعال تننگ مریک۔ بلوچ تحریک نا جمہوری تاغت آتِہ ریاستی بربریت آن نہ تو خلیفنگ و دلگرفتہ مروئی ءِ و نئے کہ اشتعال ئٹی بننگ نا، انتئے کہ ریاست نا دا چم بازیک بلوچستان ئٹی ہمو نوآبادیاتی ہاٹی، فسطائی کڑد و مہن آن اسلامی اخوت و خورہ کنوک جمہوریت نا ماسک ئے مُر کرسا اونا گواچن ئے پھاش کیک۔ ریاست نا اشتعال انگیزی تا گواچی مننگ آن بچنگ و زوراکی ءَ بیدادی تیان وے خُلینگ یا است ہسون مفنننگ و چُپ کپننگ تحریک نا جمہوری محاذ کن ساندہ بنداوی چکاس ئس مریک۔ جمہوری جہد ئنا کسر ہخس کبین و پِتی ءِ، ہموخس کوزہ گیر ریاست نا ڈوہداری تِہ پھاش کننگ ئٹ زہم تخوک ءِ۔
کوزہ مروک بلوچستان ئٹی پاکستان نا کوزہ، استعماریت، جنگی ڈوہداری و بندغی نا برخلاف ڈوہ تِہ پھاش کننگ، بلوچ آتا بنداوی بندغی حق و آجوئی نا رکھ کن جمہوری محاذ آ کاریم کننگ ئے برجاء تخوئی ءِ۔ ہچو باشعور و چائند تخوکو بلوچ ئس تحریک نا جمہوری محاذ و جمہوری جہد ئنا اہمیت و فائدہ غان نمن مننگ کپک و نئے کہ سلاہ بند محاذ نا قربانی تِہ ڈوہ پُہہ مننگ نا ردی کننگ کیک اندن کہ دا رد ئٹ کوزہ گیر دشمن نا کوشست ءِ۔ بلوچ قوم ئے جہد ئنا ہچو محاذ، ہچو سنگر و ہچو پِڑ ئس کوزہ گیر ریاست کن ہورک الوئی اف۔ تحریک آجوئی نا سرسوبی و جہد ئنا اندا خواست ءِ۔
