بلوچ یکجہتی کمیٹی نا برانزی لڑ ئنا رد ئٹ خضدار ئٹ برانز ریکارڈ کرفنگا۔
بلوچ یکجہتی کمیٹی نا کنڈ آن خضدار ئٹ برانزی ریلی ئس کشنگا و ہراٹی بلوچ یکجہتی کمیٹی نا باسک آک، زوراکی ئٹ بیگواہ کننگوک بندغ آتا خاہوت آک و شار ئنا بندغ آک بھلو کچ ئسیٹی اوار مسر۔
برانزیک شہید رزاق چوک آن آزادی چوک اسکان ریلی ئس کشار و برانز کریر، برانز ئٹ نال، وڈھ، سوراب تون اوار ایلو علاقہ آتا بندغ آک اوار مسر۔
بلوچ یکجہتی کمیٹی دا رد ئٹ پارے کہ ریاستی لشکر ہر وخت آن بار اینو ہم ننا برانزی تِہ بیم ئنا گواچی کننگ نا کوشست کرے، نیٹ ورک ئے بند کرے، کیہی لشکری کارندہ غا تِہ سلیفے، ننا برانزی تیا بیدادی و اوفتِہ دزگیر کننگ تون اوار برانز ئے دانگ اینگ کننگ نا کوشست کرے واہم برانزیک غٹ ریاستی چم بازی تیان گڈ ہم برانز ئے سرسوب کریر۔
بلوچ یکجہتی کمیٹی نا مہم، “چُپی ئے پرغنگ: زوراکی نا بیگواہی تا برخلاف بش مننگ” نا سرحال ئٹ بلوچستان نا جتا علاقہ آتیٹ برانزی لڑ ئنا بناء ئے کرینے ہراڑے داکان مُست کراچی، حب چوکی و اینو خضدار ئٹ برانز ریکارڈ کننگا۔
بلوچ یکجہتی کمیٹی تینا درشان ئٹ پارے کہ ایمنی ئٹ مروک دا برانز آتِہ کاؤنٹر کننگ نا کوشست، ریاست نا کنڈ آن اسہ وڑ دڑکو تننگ و بیدادی تیان بیدس انصاف و بقاء نا دا جنگ ئٹی ننا عزم پکّو ءِ۔ نن الس و خاص وڑ ئٹ بیگواہ غا بندغ آتا خاہوت آتیان خواست کینہ کہ او دا برانز تیٹ اوار مریر و تینا بیگواہ غا بندغ آتا حوال تِہ ننے ایتر۔
