کراچی یونیورسٹی نا خوانندہ غا تا کنڈ آن بلوچستان تون اوار کراچی آن بلوچ ورنا تا زوراکی نا بیگواہی تا برخلاف برانزی ریلی ئس کشنگ مس۔
شابیتی حوال تا رد ئٹ بلوچ خوانندہ غا تا زوراکی نا بیگواہی تا برخلاف کراچی یونیورسٹی نا خوانندہ غا تا کنڈ آن یونیورسٹی نا مونغی ٹی برانزی ریلی ئس کشِسہ برانز ریکارڈ کرفنگ مس۔
خوانندہ غاک دا وختا بلوچستان تون اوار ایلو علاقہ آتیان زوراکی نا بیگواہی تا گواچی مروکا خوانندہ غا تا عکس آتِہ ہرفیسر و اوفتا آجوئی نا خواست کننگ اسر۔
خوانندہ غاک پاریر کہ برجاء تُو کراچی آن کراچی یونیورسٹی نا خوانندہ آتون اوار کراچی نا ایلو خواننگ جاہ تیٹ خوانوک کیہی ورنا تِہ زوراکی ئٹ بیگواہ کننگانے۔ ننا خواست ءِ کہ خوانندہ غاتِہ دمدستی پھاش کرسا آجو کننگِہ نہ تو نن بیگواہ کننگوک سنگت آتا آجوئی کن برانزی تحریک بناء کرون۔
خیال ئٹ مرے کہ برجاء تُو اکتوبر ئٹی 60 آن زیات بلوچ ورنا زوراکی ئٹ بیگواہ کننگانو ہرافتان گیشتر خوانندہ ءُ۔
دا زوت ئنا زوراکی نا بیگواہی تا تدینی تا برخلاف بلوچ تنظیم آتا کنڈ آن برانز آتا لڑ برجاء ءِ و بلوچ یکجہتی کمیٹی نا کنڈ آن برانزی تحریک چلفنگ نا پڑو کنننگانے ہراڑے ملخدو کراچی درو حب چوکی و اینو خضدار ئٹ برانز کننگا۔
