“اینو ننا جنگ بیرہ تینا سرزمین کن اف، بلکن ننا شرف، دود ربیدہ و ٹیوار کن ءِ” شر حسن پارے۔
لیپزگ، جرمنی ٹی بلوچ نیشنل موومنٹ (بی این ایم) جرمنی چیپٹر نا صدر شر حسن لیپزگ ئٹی اَسہ مجلس ئسے نا وختا بلوچ راج ئنا آجوئی و جند خواجہی نا جُہد کن جہانی مُخ تفی نا ودکی آ زور تس۔
پوگ ہاؤس ئٹی ہیت کرسا او بلوچ اُلس ئنا مونا سلوک دیہاڑی بےانصافی و پاکستانی ریاست نا کُنڈ آن بندغی حق آتا لتاڑ آ روشنائی شاغا۔ او بلوچ دود ربیدئی ٹیوار و شرف ئنا رکھ ئنا اہمیت آ زور تس ہراکہ کیہی دہک آ تیان خطرہ ٹی ءِ۔
شر حسن پارے کہ اینو ننا جنگ بیرہ تینا سرزمین کن اف، بلکن ننا شرف، دود ربیدہ و ٹیوار کن ءِ، ہرادے کیہی دہک آن منظم وڑ ئٹ ڈھرفنگانے۔ دا جُہد ئٹی نن تنیا افن۔ ننے جہان نا مُخ تفی تُد ءِ، ہمر کہ اینو نا دا مُچی ننا تحریک ئے تاغت و اَسہ کلوہ ئس تیک کہ جہان ہُننگ ءِ۔ نن جہانی کہول آن خواست کینہ کہ او نہ بیرہ انصاف کن ننا فِراد ئے بنِہ، بلکن آزات بلوچستان نا جنگ ئٹی ننتون اوار سَلوک مرے۔
دا مجلس ئٹ بندغ آتا جتا وڑ ئنا ٹولی اوار اسک۔ شر حسن تینا تران ئٹی بلوچستان ئٹ برانز نا ودی مروکا چھول و تحریک ئٹی زالبول تا اہم کڑدار آ ہم ہیت کرے۔ او جہانی کہول آ زور تسک کہ او بیداری ودی کیر و بلوچ مسخت نا مُخ تفی کن گھام ارفِر۔
اونا پریزنٹیشن آن پد، مجلس ئٹ اوار مروکا بلوچ جُہد ئنا دیہاڑی تیبر، تحریک نا مونا سلوک ہڑاند آتا و جہانی مُخ تفی نا اومیت نا بارو ئٹ سوج ہم کریر۔
مجلس نا ایسر اَسہ دود ربیدئی مون پھاشی ئسیٹ مس ہراٹی دودی آ بلوچ ساز و رقص نشان تننگا۔
