آواران: مشکے ٹی پاکستانی لشکر نا اڈ تروک ڈیتھ اسکواڈ نا کارندہ غا تا سُمکاری آن اِرا بندغ بیران مسنو۔
بیران مروکا ورنا تا چاہنداری جنگی خان نا مار عبدالحق و نیک سال نا مار لیاقت نا پن تیٹ مسُنے ہرافک مشکے منجو نا جہی ءُ۔
ڈیتھ اسکواڈ نا کارندہ غاک گجر بازار ئٹی سُمکاری کرسا تومکا تِہ کھسفینو۔
حوال تروکا تا پاننگ ءِ کہ داکان مُست عبدالحق نا ایلم عیسیٰ ئے خَدو 30 جون آ ڈیتھ اسکواڈ نا کارندہ غاک سُمکاری کرسا خلکُسر، ہموتم اونا چنُکا مار سمیر ٹپی مسس۔
اوکان مُست 14 مارچ 2018 آ دافتا اُراغا جلہو کننگ مسس و عبدالحق نا سالُم مبارک ولد لشکری و اونا مار محبت خان آ سُمکاری کرسا اوفتِہ کھسفیسر۔
ہندی حوال تا رِد ئٹ دا بندغ آتِہ بھاز وخت ئے پاکستانی لشکر نا زوراکی آن ہمپسہ مشکے پروار آ اترننگ مسنو۔
عبدالحق ئے بھاز وار پاکستانی لشکر دزگیر کرسا بیگواہ کریسس و بھاز بیدادی تیان گڈ یلہ کنگاسس۔
عبدالحق خَدو تینا ذیہا مروکا ریاستی زوراکی نا برخلاف پریس کانفرنس ئس کریسس و اونا پریس کانفرنس نا توار بند ئے ریڈیو زرمبش ہم شنگ کریسس۔
