حوال تا رد ئٹ درو ننکان بلوچستان نا ضلع ڈیرہ بگٹی آن پاکستانی لشکر مُسہ ایلم تون اوار پنچ بندغ زوراکی ئٹ بیگواہ کرینے۔
شابیتی حوال تا رد ئٹ بلوچستان نا ضلع ڈیرہ بگٹی نا تحصیل سوئی ٹی درو نن نیمہ غا کاونٹر ٹیررزم ڈیپارٹمنٹ (سی ٹی ڈی) و آئی ایس آئی نا کارندہ غاک رحمان کالونی، طوطا کالونی و محمد کالونی ٹی چھاپہ خلِسہ چُنا نیاڑی تِہ بیدادی نا گواچی کریر و پنچ بندغ دزگیر کرسا تینتو دریر ہراکان گڈ اوفتا ہچ ڈس اف۔
چھاپہ تا وختا پاکستانی لشکر نا دو آن زوراکی ئٹ بیگواہ کنگوک پنچ بندغ نا چاہنداری گلاب بگٹی نا مُسہ مار شربت، برکت و گاہی خان، اندن ہیڈ ماسٹر نواز بگٹی نا مار خیراللہ و علی خان بگٹی نا مار غلام رسول نا پن تیٹ مسنے ہرافتِہ بلوچ ریپبلکن پارٹی تینا چاگڑدی حوالکاری میڈیا غا شنگ کروک پوسٹ ئسیٹی پک کرینے۔
جہی حوال تا رد ئٹ زوراکی ئٹ بیگواہ کننگوک بندغ آتا کچ پنچ آن زیات ءِ ولے ایلوفتا بارو ئٹ دائسکان جوانیکا سما اف، و ودیک معلومداری رسینگتنے۔
