زورانسری بیگواہی تا برخلاف ڈپٹی کمشنر پنجگور نا دفتر نا مونا برانز اینو ہم برجاء سلیس۔
شابیتی حوال تا رد ئٹ پنجگور آن پاکستانی لشکر نا دُو آن زوراکی ئٹ بیگواہی کننگوک اِرا ایلم صابر نور و عابد نور نا بیگواہی و وے آجو مننگ نا برخلاف خاہوت و ہندیک برانز کننگ ءُ۔
تومکا ایلم تاآجوئی کن چھارمیکو دے ہم برانز برجاء سلیس ہراڑے خاہوت عابد نور و صابر نور نا آجوئی نا خواست کرے۔
ہندا سال ستمبر نا گُڈ ئٹ پنجگور آن زورانسری بیگواہی تا گواچی مروکا ورنا تا خاہوت تُدوکا چھار دے آن برانز کننگ ءِ و اوفتون اوار ایلو بیگواہ کننگوک بندغ آتا خاہوت آک، ہندیک و سیاسی، چاگڑدی تنظیم آتا باسک آک ہم برانز ئٹی اوار ءُ۔
تُدوکا دے ورنا تا وے آجو مننگ نا برخلاف برانزی ریلی کشنگا و برانز کننگا۔ برانزی ریلی ٹی زالبول و چُنا تیتون اوار اُلس ہم بھلو کچ ئسیٹ اوار مرسا زورانسری بیگواہی تا برخلاف برانز ریکارڈ کرفیر۔
برانزیک خواست کریر کہ بیگواہ کننگوک عابد نور و صابر نور ئے زوت پھاش کننگِہ، نہ تو ننا برانز پین سخت مرو ہرانا کُل زمہ واریک انتظامیہ غا مرو۔
