دکی ٹی کولا کانڑ نا مزور تیا مروکا جلہو و 21 مزور نا کھسفنگ مننگ آن پد ضلع ٹی کوئلہ نا سپلائی بند ءِ۔
لیبر ایسوسی ایشن نا رد ئٹ سیکیورٹی مفننگ نا سوب آن 40 ہزار مزور تینا باوہ پیرئی علاقہ تیا ہنانو۔
ایسوسی ایشن نا پاننگ ءِ کہ ضلع نا 1200 آن گیش کولا کانڑ تیٹی 50 ہزار پیشن نا مزور کاریم کیریرہ۔ ہڑدیئی بنداو آ 150 اسکان ٹرک سندھ، پنجاب و ایلو شار تیٹی کوئلہ رسیفیرہ۔
لیبر ایسوسی ایشن نا پاننگ ءِ کہ کوئلہ سپلائی بند مننگ آن ڈیہہ ئٹی زرکاری ہم زیمی ءِ۔
ایسوسی ایشن نا رد ئٹ بلوچستان نا کوئلہ مڈی تا وزن 25 کروڑ ٹن آن گیشتر ءِ ہراڑے کوئلہ نا 2600 کانڑ تیٹی 80 ہزار مزورک کاریم کریرہ۔
لیبر ایسوسی ایشن نا پاننگ ءِ کہ بلوچستان حکومت دکی جلہو ئٹی مزور تا خاہوت آتِہ 15,15 لکھ تننگ نا پڑو کریسس۔ دکی ٹی مروکا جلہو ئٹی 21 مزور خلنگ مسوسر ہرافتا خاہوت آتِہ دائسکان معاوضہ تننگ متنے۔
یاتی مرے کہ خلنگ مروکا مزور تیٹی شش اوغان شاری تُد اسُر۔
