حوال تا رد ئٹ بلوچستان نا علاقہ ڈیرہ بگٹی ٹی تدوکا کیہی دے آن برجاء لشکر کشی نا وختا پاکستانی لشکر بیست آن زیات بندغ دزگیر کننگ آن گڈ بیگواہ کرینے۔
دا رد ئٹ بلوچ ریپبلکن پارٹی نا بنجائی ترجمان اسہ بیان ئسیٹی پارینے کہ تدوکا کیہی دے آن ڈیرہ بگٹی نا جتا جہہ تیا لشکر کشی و زوراکی نا بیگواہی تا لڑ برجاء ءِ۔ پاکستانی لشکر تدوکا منَہ دے ئٹی ڈیرہ بگٹی نا جتا جہہ تیان کیہی بندغ زوراکی ئٹ بیگواہ کرینے۔
پارٹی نا رد ئٹ ڈیرہ بگٹی نا جتا جہہ تیٹ لشکر کشی و اُرا تیا چھاپہ نا وختا پاکستانی لشکر بگٹی قبیلہ نا کیہی بندغ دزگیر کننگ آن گڈ بے ڈسو ہند ئسے آ درینے۔
بی آر پی نا کنڈ آن چاگڑدی حوالکاری میڈیا ایکس آ شنگ کروک حوال تا رد ئٹ پاکستانی لشکر نا دو آن دائسکان زوراکی ئٹ بیگواہ کننگوک بندغ آتیٹ لیویز ایس ایچ او طارق بگٹی، اونا ایلم مرتضیٰ بگٹی، اوفتا الہ مار رئیس بگٹی اوار ءُ۔
اندن ایلو بیگواہ کننگوک آتا بارو ئٹ چائندئی شنگ کرسا پارے کہ زوراکی ئٹ بیگواہ کننگوک ایلو بندغ آتیٹ برکت بگٹی، تاہو بگٹی نا مار پرہو بگٹی، میشو بگٹی نا مار ڈاکٹر وزیر، میر دوست بگٹی نا مار فضل حسین، پاہی بگٹی نا مار فضل، گہنور بگٹی نا مار قربان، عثمان بگٹی نا چُنک سن مار زاہد و ٹیکہ خان بگٹی نا مار قاسم ہم اوار ءُ۔
بی آر پی نا رد ئٹ تدوکا منَہ دے ئٹی پاکستانی لشکر و ڈھکوک ایجنسیک ڈیرہ بگٹی نا جتا ہند آتیان 25 نا کچ جہی بگٹی چھاپہ تا وختا زوراکی ئٹ بیگواہی نا گواچی کرینو ہرافتیان منٹ ئسے نا چاہنداری دائسکان مننگ کتنے۔
خیال ئٹ مرے کہ بلوچستان ئٹی اسہ وار پدا لشکر کشی و زوراکی نا بیگواہی تیٹ ترندی بسنے۔
ڈیرہ بگٹی تون اوار، قلات، مستونگ، نوشکی ٹی لشکر کشی تا لڑ برجاء ءِ و اینو تربت نا مشی آ لڑ تیٹ ہم بھلو کچ ئسیٹی پاکستانی لشکر گھام خلنگ آ خننگ مسنے۔
ڈیرہ بگٹی آن زوراکی ئٹ بیگواہ کننگوک بندغ آتیان ویتہ برجاء تُو ئٹی بلوچستان نا جتا ضلع، کراچی و پنجاب آن 39 بلوچ زوراکی ئٹ بیگواہ کننگانو ہرافتیان 35 نا دائسکان ہچ ڈس اف۔
