پاکستانی لشکر نا دو آن زوراکی ئٹ بیگواہ کننگوک صابر نور و عابد نور نا آجوئی کن خاہوت نا کنڈ آن برانز اینو ہم برجاء ءِ، ہراڑے جہی مخلوق بھلو کچ ئسیٹی برانز ئٹ اوار ءِ۔
بلوچستان نا ضلع پنجگور آن زوراکی ئٹ بیگواہ کننگوک ارا ایلم، صابر نور و عابد نور نا خاہوت نا کنڈ آن اوفتا آجو مفننگ نا برخلاف اینو برانزی ریلی ئس ہم کشنگا۔
ریلی ٹی چُنا نیاڑی تتون اوار الس بھلو کچ ئسیٹی اوار مس و زوراکی نا بیگواہی تا برخلاف نعرہ خلکر و تومکا ایلم تا آجوئی نا خواست کریر۔
خاہوت نا پاننگ اس کہ اینو 18 دے مسنے کہ صابر نور و عابد نور ویتہ ڈوہ آن ریاستی ٹارچر سیل تیٹی تادی تہ سگنگ ءُ۔
او پاریر کہ 31 ستمر آ سہب ئنا پاکستانی لشکر پنجگور نا علاقہ تار آفس ئٹی چھاپہ خلِسہ تومکا ایلم تِہ بے قانودی دزگیر کرے و تینتو درے ہراکان گڈ اوفتا ہچ ڈس اف۔
خاہوت ہنوکا کیہی دے آن تولوک برانز کننگ ءِ و دا نیامٹ کیہی وار برانزی ریلی ہم کشانو۔ اوفتا پاننگ ءِ کہ ایسکان صابر نور و عابد نور ئے یلہ کتنو ننا برانز برجاء مرو و نن تینا برانز ئے ودفون۔
