بندغی حق آتیکن کاریم کروک تنظیم بلوچ وائس فار جسٹس اسِہ ہفتہ ٹی تربت، کراچی، حب و پنجگور آن 18 آن زیات ورنا تا زورانسری بیگواہی آ فریشانی نا درشانی کرینے۔
تنظیم تینا شنگ مروک اسہ درشان ئسیٹی پارینے کہ بلوچ خوانندہ غا تا زورانسری بیگواہی اسِہ بھلو ویل اسے۔ 16 اکتوبر آ کراچی آن شعیب، حنیف، اشفاق، شہزاد، بیبرگ، زبیر، قمبر سعیداللہ و جاوید ئے بیگواہ کننگا۔ اوفتا خاہوت خلیس ئٹ زند تیر کننگ ءِ۔
داڑان بیدس تِدوکا دے تیٹی کراچی آن پاکستانی لشکر اسِہ ہوٹل ئسے آ چھاپہ خلسہ پنجگور پروم نا ہندی چھار ورنا، زین بلوچ، ظریف احمد، اکرم بلوچ و انیس بلوچ ئے زوراکی ئٹ بیگواہ کرے۔ حاجی نبی بخش نا مار علی حیدر ئے خضدار نا علاقہ کوڑاسک آن پاکستانی لشکر درو ننکان یک بجہ غا اُراغا چھاپہ خلسہ بیگواہ کرے۔
تربت آن زوراکی ئٹ بیگواہی تہ پک کرسا تنظیم پارے کہ عطا اللہ، حمید اللہ و بلال امام ئے ریاستی لشکر زوراکی ئٹ بیگواہ کرینے۔ دا مُسٹ انگا ورنا تِہ 8 آن 13 اکتوبر 2024 نا نیامٹ تربت آن زوراکی ئٹ بیگواہ کننگانے۔
جنید حمید ئے 8 اکتوبر نا نن حب چوکی آن و اونا ایلم یاسر حمید ئے 11 اکتوبر آ قلات آن زوراکی ئٹ بیگواہ کننگانے۔
بلوچ وائس فار جسٹس اقوام متحدہ نا زورانسری بیگواہی تیا کاریم کروک ورکنگ گروپ، ایمنسٹی انٹرنیشنل و ہیومن رائٹس واچ آن خواست کرے کہ او ریاستی لشکر نا کُنڈ آن بندغی حق آتا لتاڑ و زورانسری بیگواہی تا نوٹس ئے ہلیر۔
تنظیم یات ترفے کہ اقوام متحدہ نا جنرل اسمبلی نا قرارداد 65/209 و69/180 نا رد ئٹ زورانسری بیگواہی بندغی حق آتا بھلا لتاڑ تیان ءِ، و ہر اسہ ڈیہہ ئنا دا زمہ واری مریک کہ او دا تُدینی تِہ تورر، ہر بندغ ئے بے قانودی دزگیری یا بیگواہی آن رکھنگ مرے۔ شق 4 ئٹی پاننگانے کہ ریاست آک زورانسری بیگواہی نا تُدینی تا پٹ ءَ پول کننگ و اوفتا برخلاف قانودی کاروائی کننگ نا زمہ وار ءُ۔
تنظیم خبڑدار کرے کہ بندغی حق آتا تنظیم آتا کُنڈ آن بلوچستان ئٹی مروکا زورانسری بیگواہی و بندغی حق آتا لتاڑ آ پام تفننگ نا سوب آن اَسہ بھلو بندغی کاختی ئس ودی مسُنے۔
