کراچی آن بیگواہ کننگوک خوانندہ غاتا خاہوت آک پریس کانفرنس کرسا پاریر کہ اینو نن داڑے تینا زوراکی ئٹ بیگواہ کننگوک بندغ آتا بارث ئٹ ساڑی ان، ہرافتِہ کراچی سی ٹی ڈی لشکر درو 16 اکتوبر آ بے قانودی دزگیر کننگ آن گڈ زوراکی ئٹ بیگواہ کرینے۔
او پاریر کہ ننا بندغ آتون اوار نُہہ خوانندہ ئے زوراکی ئٹ بیگواہ کننگانے ہرافتیٹ پسنی نا جہی بختیار نا مار شعیب ہرا کراچی یونیورسٹی ٹی شعبہ دیہاڑ ئٹ خواناکہ، اورماڑہ نا جہی بدل نا مار حنیف ہرا بنجائی اردو یونیورسٹی ٹی خواناکہ، گریشہ خضدار نا جہی خالق داد نا مار اشفاق ہرا دینی مدرسہ ٹی خواناکہ، گریشہ خضدار نا جہی خالد نا مار شہزاد ہرا دینی مدرسہ ٹی خواناکہ، وشبود پنجگور نا جہی امیر بخش نا مار بیبگر ہرا کراچی یونیورسٹی ٹی شعبہ دیہاڑ ئٹ خواناکہ، ضلع کیچ ئنا جاگہ مند ئنا جہی کریم بخش نا مار زبیر ہرا انٹرمیڈیٹ ئٹ خواناکہ، گریشہ خضدار نا جہی مسکان نا مار قمبر علی ہرا انٹرمیڈیٹ ئٹ خواناکہ، گڈانی نا جہی در محمد نا مار سعید اللہ ہرا کراچی یونیورسٹی ٹی قانود نا شعبہ ٹی خواناکہ و لال بخش نا مار محمد جاوید ہرا کراچی یونیورسٹی ٹی شعبہ دیہاڑ ئٹ خواناکہ، دا غٹ ورناک اوار ءُ۔
اوفتا پاننگ اس کہ دافتان ہشت خوانندہ ئے خن ئٹ خنوک شاہد آتا مونا ویگہ نا پنچ آن شش بجہ نا نیام ئٹی سی ٹی ڈی پولیس نا بھلو لشکر ئس ہرا دہ آن دوانزدہ اُلاخ ئٹ بسوسر، ہرافتتون سیول وردی بینوکو بندغ ہم تُد مسنے، خوانندہ غا تِہ گلشن اقبال نا علاقہ بشیر ویلیج آن اسہ اپارٹمنٹ نا جتا گیڈ آتیان ہرفِسہ بیگواہ کرینو۔
او پاریر کہ ننا چُناک دا ڈیہہ ئٹی ہچ جاگہ ئسے آ ہم رکھوک افس، دو ہورک و بےڈوہ آ خوانندہ غاتہ ویتہ ہچو سوب آن و بیدس قانود دزگیر کرسا کراچی سی ٹی ڈی لشکر بیگواہ کرینے و ایلو دے برسا اوفتا گیڈ آتیٹ اوفتا لیپ ٹاپ و ایلو مڈی تہ ہم ہرفسہ درینو۔
او پریس کانفرنس ئٹ پاریر کہ وختس کہ نن پولیس تھانہ غا ایف آئی آر کننگ کن ہنان تو او ننا فریاد ئے بِننگ آن نمن مسر و ساف پاریر کہ او تینا ادارہ غا تا پنا ایف آئی آر کروفس۔ ہرا ڈیہہ ئٹی قانود نا رکھوک آک بےقانودی دو ہورک آ بندغ آتہ دزگیر کرسا دا وڑ بے ڈس کیرہ تو نن انصاف خواہنگ کن ارانگ کان؟
اوفتا ودیک پاننگ اس کہ مگہ نن دا ڈیہہ ئنا شاری افن؟ دا ڈیہہ ئنا شاری مننگ نا سوب آن مگہ ننے دا بنداوی حق ہم اف کہ نن تینا بیگواہ کننگوک بندغ آتا سرسلامتی نا بارو ئٹ سوج کین؟ ننے بیرہ انداخس پاننگ مرے کہ ننا بندغ آتہ ارا ڈوہ ئٹی دن گھرِسہ درینو و زوراکی ئٹ بیگواہ کرینو، مگہ اوفتا ڈوہ بیرہ اندادے کہ او بلوچ ءُ؟
او ایسر ئٹ پاریر کہ نن اینو داڑے اندا فریاد ئے ہیسونن کہ ننے بِننگ مرے، ننا توار ئے ہمو ذمہ وار ادارہ تہ اسکان سر کننگ مرے ہرا ننا بندغ آتہ بیدس سوب آن بے قانودی دزگیر کرسا بیگواہ کرینو۔ نن بندغی حق آتا ادارہ غا تیان خواست کینہ کہ او دا بے بندغی کاریم نا برخلاف توار بڑز کیر و ننا بندغ آتہ آجو کننگ ئٹ ننے کمک کیر۔
