دا اوڑدئی ٹی جان میکڈونل چیئرمین بی این ایم ئے مخ تفی نا باور تس۔
بلوچ نییشنل موومنٹ ( بی این یم ) نا چیئرمین ڈاکٹر نسیم بلوچ برطانیہ نا پارلیمنٹ نا باسک جان میکڈونل تون برطانیہ نا پارلیمنٹ ئٹی اوڑدئی کرے و اودے بلوچستان نا پوسکنا حالیت نا بارث ئٹ سرپندی تس۔
جان میکڈونل بندغی حق و ایلو ویل آتیا چیئرمین بی این ایم ئے تینا مخ تفی نا باور کرفے۔
بی این ایم نا کنڈ آن ستمبر نا تُو ئنا نیام ئٹی بلوچستان نا راجی آجوئی نا تحریک و بندغی حق آتا حالیت آتا بارث ئٹ سرپندی تالان کننگ کن بھلو کچ ئسیٹی اسہ مہم ئس بناء کننگا ہرا نا موہکشی ئے بی این ایم نا چیئرمین کننگ ءِ۔ دا رد ئٹ او اقوام متحدہ نا 57 میکو بندغی حق آتا کونسل نا مجلس تتون اوار کیہی کانفرنس آتیٹ اوڑدئی کرے و جتا ادارہ غاتا نمائندہ غا تتون ہم اوڑدئی کرے۔
دا مہم نا ارٹمیکو بشخ ئٹی او برطانیہ ٹی ساڑی ءِ ہراڑے او اسہ تنظیمی مجلس ئسے تون اوار ورلڈ سندھی کانگریس نا کانفرنس ئٹی اوڑدئی کرے و بلوچ راج ئنا خیرخواہ و برطانیہ نا سیاستدان جان میکڈونل تون ہم اوڑدئی کرے۔
جان میکڈونل برطانیہ نا بھلو سیاستدان ئس ءِ ہرا چاگڑدی انصاف، وے بریبری نا ایسری کن معاشی جوانی ہتنگ، ڈیموکریٹک سوشل ازم، جہانی ایمنی و ماحولیات استحکام نا وکالت کن چاننگک۔
او تدوکو بھلو وخت ئسے آن بلوچستان ئٹی بندغی حق آتا حالیت آ برطانیہ نا پارلیمنٹ ئٹی تینا فریشانی نا درشانی کننگ ءِ۔ بلوچستان ئٹی بندغی حق آتا لتاڑ ئے پھاش کننگ و بلوچ جند خواجہی نا مخ تفی ٹی بلوچ سیاسی تپہ غا تیٹ جان میکڈونل قدر کڑزوکو شخصیت ئس ءِ۔
دا اوڑدئی ٹی چیئرمین ڈاکٹر نسیم تون اوار بی این ایم نا نا جونیئر جوائنٹ سیکریٹری حسن دوست بلوچ، ادارہ نا ڈنی کاریم تا کمکار فہیم بلوچ و ڈپٹی کوارڈینیٹر نیاز بلوچ اوار اسر۔
