بلوچ نیشنل مومنٹ نا بندغی حق آتا ادارہ پانک ایکس آ تینا بیان ئسیٹی کراچی و وندر آن بیگواہ کننگوک ورنا تا رد ئٹ پارینے کہ اوفتا بیگواہی نا بارث ئٹ ساف پٹ ءَ پول کننگ مرے و ذمہ وار تیان دا نا ورندی ہلنگ مرے۔
او پارے کہ پانک پاکستانی حکومت آ زور شاغک کہ او زوراکی نا بیگواہی تا دود ئے ایسر کے و زوراکی نا بیگواہی تیان غٹ بندغ آتہ رکھنگ کن جہانی راہبند نا پابند مرے۔
اونا پاننگ اس کہ پاکستان ئے خوانندہ، کارکن، و نسلی اقلیت آتا حق ئنا رکھ ئے کروئی ءِ، خاص وڑ ئٹ بلوچستان کون آ علاقہ ہرا جتا ویل آتا گواچی ءِ، ہراڑے پاکستانی لشکر بندغی حق آتا لتاڑ نا دیہاڑ نوشتنگ ءِ۔
او پارے کہ زوراکی نا بیگواہی تہ مرغن چھکنگ پاکستان، خاص وڑ ئٹ بلوچستان ئٹی زوراکی نا سلاہ نا وڑ کاریم ئٹ ہتنگ مسنے، ہراڑے سیاسی مخالف آتا مون ئے نہار کون آ زوراکی تیٹ توننگ مریک۔ دا خوانندہ غا تا زوراکی نا بیگواہی اندا برجاء غا جنجال آتا اسہ پین مونو بشخ ئس ءِ، ہرا دمدستی جہانی پام و دو شاغنگ خواہک۔
پانک جہانی کہول، بندغی حق آتا تنظیم و ڈن ڈیہی حکومت آتیان خواست کرینے کہ او بیگواہ کننگوک خوانندہ غا تِہ پٹنگ و آجو کننگ کن پاکستان آ زور شاغر و دا وڑ ئنا بندغی حق آتا سخت لتاڑ تیٹ تُد ریاستی ادارہ غا تا دود ہلوک کاریم تِہ تورِر۔
او پارے کہ پانک بیدس ہچو عمل ئسے آن و اوفتا بندغی حق آتا لتاڑ کرسا بندغ آتا زوراکی نا بیگواہی نہ بیرہ جہانی قانود نا رد ئٹ بے قانودی کاریم ئس ءِ بلکہ دا اسہ اخلاقی ظلم ئس ءِ ہرادے توننگ مرے۔
