بلوچستان نا ضلع پنجگور و خضدار آن پاکستانی لشکر مُسہ بندغ دزگیر کننگ آن پد بیگواہ کرینے۔
بیگواہ کننگوک بندغ آک حاجی نبی بخش نا مار علی حیدر، سراج رشید و شہاب نا پن تیٹ درست مسنو۔
علی حیدرئے خضدار نا ہند کوڑاسک آن پاکستانی لشکر استو ننکان یک بجہ غا اُراغا چھاپہ خلِسہ دزگیر کننگ آن پد بیگواہ کرینے۔
علی حیدر نا خاہوت سیاسی تپہ، خوانندہ تنظیم و بندغی حق آتا تنظیم آتیان علی حیدر کن توار بُڑز کننگ نا خواست کرینے۔
ایلو کنڈ آن پنجگور آن حوال ءِ کہ مُسہ دے مُست پنجگور نا ہند پروم آن پاکستانی لشکر سراج و شہاب ئے دزگیر کننگ آن پد بیگواہ کرینے ہراکان گڈ اوفتا ہچ ڈس اف۔
خاہوت نا رد ئٹ اِرٹنگا سنگت آک تدوکا دے تیٹ زامران آ ہناسُر واپس بننگ آ پروم آن پاکستانی لشکر اوفتِہ بیگواہ کرینے۔
