حوال تا رد ئٹ پاکستانی لشکر کراچی و وندر آن 9 بلوچ ورنا دزگیر کننگ آن گڈ زوراکی ئٹ بیگواہ کرینے۔
کراچی آن بیگواہ کننگوک ورناک کیچ مند ئنا جہی زہیر شوکت، پنجگور وشبود نا جہی بیبگر امیر، نال ئنا جہی اشفاق خالقداد، نال ئنا جہی شہزاد خالد، نال ئنا جہی کمبر علی، اورماڑہ نا جہی حنیف بدل، پسنی نا جہی شعیب علی و گڈانی نا جہی سعید اللہ نا پن ئٹ درست مسنو۔
پن کروک ورنا تِہ پاکستانی لشکر کراچی نا علاقہ گلشن آن دزگیر کننگ آن گڈ بیگواہ کرینے۔
اندن وندر آن بیگواہ کننگوک ورنا جاوید نا پن ئٹ درست مسنے۔
پن کروک غٹ ورناک کراچی ٹی خواننگ اسر، اوفتیان شعیب، جاوید و بیبگر کراچی یونیورسٹی ٹی دیہاڑ نا شعبہ ٹی، حنیف فیڈرل ارود یونیورسٹی کراچی نا، اشفاق و شہزاد مدرسہ نا، کمبر ایف اے سی و سعید اللہ قانود نا خوانندہ ئس اس۔
خیال ئٹ مرے کہ اندا دے تیٹ کراچی ٹی بلوچ ورنا تا زوراکی نا بیگواہی تا تدینی تیٹ ودکی مسنے، درو کراچی نا علاقہ صدر ئٹی اسہ ہوٹل ئسے آ چھاپہ خلِسہ پاکستانی لشکر چھار ورنا دزگیر کننگ آن گڈ بیگواہ کریسس ہرافتا دائسکان ہچ ڈس اف۔
