ایمنسٹی انٹرنیشنل پارینے کہ پاکستان 17 و 18 اکتوبر آ جنیوا ٹی اقوام متحدہ نا بندغی حق آتا کمیٹی نا کنڈ آن بندغی حق آتا برجاء لتاڑ نا سوب آن تینا ارٹمیکو جاچ ئے ہلو۔
دا جاچ ICCPR نا شاری و سیاسی حق آتا جہانی معاہدہ نا رد ئٹ مرو ہراڑا پاکستان دستخط کرینے۔
ایمنسٹی نا جاندمی ایشیاء نا جہی ڈپٹی ڈائریکٹر بابو رام پنت پارینے کہ جاچ اسہ ہندنو وخت ئسے آ مننگ ءِ کہ پاکستان ئٹی بندغی حق آتا لتاڑ ئٹ بھاز ودکی مننگ ءِ۔
پولیس نا کنڈ آن مذہب نا بےشرفی تا رد ئٹ اِرا بیدس عدالت پھاؤ، ایمنی ئٹ برانز کروکا تیا کریک ڈاؤن، مُچی و السی آرڈر ایکٹ 2024 نا خلنگ، سیاسی مخالف پارٹی تا باسک و سروک آتا بھلو کچ ئسیٹی دزگیری، پشتون تحفظ موومنٹ آ رکھ و ڈاکٹر ماہ رنگ بلوچ کون آ بندغی حق آتا باسک آتِہ تنگ کننگ نا تدینیک تدوکا تُو ئٹی رپورٹ مسنو۔
بابا رام پنت پارے کہ دا جاچ پاکستانی حکومت کن اسہ وارخواہیس ءِ کہ او ڈیہہ ئٹی بندغی حق آتا حالیت نا جاچ ہلے و جاچ ئنا وختا ہرفوکا بندغی حق آتا خلیس ئے مُر کننگ کن سختو گھام ہرفِہ۔
پشتون تحفظ مومنٹ ئے کالعدم پاننگ ئے بے قانودی و بے راہبندی پارِسہ ایمنسٹی انٹرنیشنل پی ٹی ایم آ رکھ ئے مُر کننگ نا خواست کرے، و دادے شاری آجوئی و ایمنی ئٹ مُچی اڈ تننگ نا حق ئنا لتاڑ پارے۔
ایمسنٹی تدوکا تُو، سندھ و بلوچستان ئٹی پولیس کارندہ غا تا دو آن مذہب نا بےشرفی نا دوبہ ٹی دزگیر مروکا تِہ کھسفنگ نا "تیبہ، غیر جانبدار و آزات” پٹ ءَ پول نا خواست کرے۔
ایمنسٹی انٹرنیشنل نا رد ئٹ او پاکستانی نمائندہ غا تا مونا ماہ رنگ بلوچ نا کیس ئے ہم ہفور ہراڑے تدوکا ہفتہ بلوچ بندغی حق آتا باسک آتیا سلاہ بند تنظیم آتا کمکاری نا دوبہ خلنگا و اوکان مُست اودے امریکہ غا سفر کننگ آن توننگا۔
